চুবুৰীয়া দেশ ভূটানত সন্ধানহীন হৈ পৰিছে যোগীঘোপাৰ বাসিন্দা ভৰালকুণ্ডি বিল গাঁৱৰ ছাদ্দাম আলী নামৰ এজন যুৱক। অঞ্চলটোত সৃষ্ট বানপানীয়ে তেওঁক উটুৱাই নিব পাৰে বুলি পৰিয়ালৰ লোকে সন্দেহ প্ৰকাশ কৰিছে।
ড্ৰাইভাৰ হিচাপে কাম কৰা ছাদ্দাম আলীয়ে যোৱা ১১ জুলাইত নিজৰ ট্ৰাকৰ বাবে শিল পৰিবহণৰ উদ্দেশ্যেৰে ভূটানলৈ গৈছিল। কিন্তু ভূটানৰ ছামচেত যান্ত্ৰিক বিজুতিৰ সন্মুখীন হোৱাত তেওঁৰ যাত্ৰাই অভাৱনীয় ৰূপ ধাৰণ কৰে। ছাদ্দাম আলীয়ে পৰিয়ালৰ লোকক এই পৰিস্থিতিৰ বিষয়ে অৱগত কৰে।
বিজুতিৰ ফলত পলম হোৱাৰ বাবে ছাদ্দাম আলীয়ে ট্ৰাকখনত ৰাতিটো কটাবলৈ সিদ্ধান্ত লয়। ১২ জুলাইৰ নিশা অঞ্চলটোত এক ভয়াৱহ বানপানীৰ জোৱাৰে ট্ৰাকখনক আগুৰি ধৰি নদীৰ প্ৰচণ্ড সোঁতত বুৰাই পেলায়।
ভূটান কৰ্তৃপক্ষৰ প্ৰচেষ্টাত নদীৰ প্ৰবল ধাৰাটোৰ পৰা ট্ৰাকখনৰ অৱশিষ্ট উদ্ধাৰ কৰিবলৈ সক্ষম হয়। অৱশ্যে এতিয়ালৈকে ছাদ্দাম আলীৰ কোনো সন্ধান পোৱা নাই।
এই দুখজনক পৰিস্থিতিৰ সন্মুখীন হৈ ছাদ্দাম আলীৰ পৰিয়ালে তেওঁক বিচাৰি উলিওৱা আৰু উদ্ধাৰৰ ক্ষেত্ৰত শীঘ্ৰে ব্যৱস্থা গ্ৰহণ কৰিবলৈ ৰাজ্য চৰকাৰক জৰুৰী আহ্বান জনাইছে।
