২০২৩ৰ ১৫ আগষ্টৰ ভিতৰত মুকলি হ'ব ১০০০ খেলো ইণ্ডিয়া কেন্দ্ৰ: ক্ৰীড়া মন্ত্ৰী অনুৰাগ ঠাকুৰ

ক্ৰীড়া মন্ত্ৰী অনুৰাগ ঠাকুৰে শুকুৰবাৰে লোকসভাত জনায় যে ২০১৪ চনত ক্ৰীড়া মন্ত্ৰালয়ৰ বাজেট আছিল ১২১৯ কোটি টকা, যি এতিয়া ৩০৬২ কোটি টকালৈ বৃদ্ধি পাইছে। ক্ৰীড়া মন্ত্ৰীগৰাকীয়ে ক্ৰীড়া আৰু এই সন্দৰ্ভত চৰকাৰে গ্ৰহণ কৰা পদক্ষেপ সন্দৰ্ভত প্ৰশ্নৰ উত্তৰ দিবলৈ গৈ এই কথা প্ৰকাশ কৰে। তেওঁ কয় যে ইয়াৰ পূৰ্বে কেৱল ক্ৰীড়া বিভাগৰ বাজেট আছিল ৮৭৪ কোটি টকা, যি এতিয়া দুই হাজাৰ কোটি টকাতকৈও অধিক লৈ বৃদ্ধি পাইছে। তেওঁ লগতে কয়-আমি শীঘ্ৰেই মালখাম্ব, থাং টা, যোগচান, গাটকা আৰু কালপেট্টাৰ দৰে পৰম্পৰাগত ক্ৰীড়াক আন্তঃৰাষ্ট্ৰীয় পৰ্যায়লৈ লৈ যাম। মন্ত্ৰালয়ে অহা বছৰৰ ১৫ আগষ্টৰ ভিতৰত ১০০০ খেলো ইণ্ডিয়া কেন্দ্ৰ মুকলি কৰিব। ৭৩৩ টা কেন্দ্ৰ খোলাৰ প্ৰক্ৰিয়া ইতিমধ্যে আৰম্ভ হৈছে। তেওঁ আৰু কয়-ৰাষ্ট্ৰীয় ক্ৰীড়া সংহিতা সংশোধনীয়ে ইতিবাচক ফলাফল প্ৰদান কৰিছে। ক্ৰীড়া সংস্থাত খেলুৱৈ আৰু মহিলাৰ অংশগ্ৰহণ বৃদ্ধি পাইছে। শেহতীয়াকৈ, কমলেশ মেহতাক ভাৰতীয় টেবল টেনিছ ফেডাৰেচনৰ সাধাৰণ সম্পাদক হিচাপে নিযুক্তি দিয়া হৈছে। ২০২৩ চনৰ ১ এপ্ৰিলৰ পৰা ক্ৰীড়া সংস্থা সম্পৰ্কীয় অভিযোগ আৰু পৰামৰ্শ অনলাইনত দিয়া হ’ব।