অসমত বানপানীৰ পৰিস্থিতি অত্যন্ত সংকটজনক হৈ পৰিছে। অসম দুৰ্যোগ ব্যৱস্থাপনা বিভাগৰ শেহতীয়া প্ৰতিবেদন অনুসৰি, ৰাজ্যখনৰ ১১ খন জিলাৰ প্ৰায় ৭.২১ লাখ লোক এই বানৰ দ্বাৰা গুৰুতৰভাৱে প্ৰভাৱিত হৈছে। কাৰ্বি আংলং, গোলাঘাট, চৰাইদেউ, কামৰূপ, শিৱসাগৰ, যোৰহাট, ডিব্ৰুগড়, নগাঁও, ধেমাজি, হোজাই আৰু কামৰূপ (মেট্ৰ’)—এই ১১ খন জিলাৰ প্ৰায় ৯০০ টা গাঁও বানত আক্ৰান্ত হৈছে। শিৱসাগৰ জিলা আটাইতকৈ বেছি ক্ষতিগ্ৰস্ত হৈছে, য’ত ৩,৯২,১৯৫ গৰাকী লোক প্ৰভাৱিত হৈছে। ইয়াৰ পিছতে চৰাইদেউ (১,১০,৭৫৫ জন), যোৰহাট (৯৭,৬৯০ জন) আৰু ডিব্ৰুগড় (১৩,৩৯০ জন) জিলা প্ৰভাৱিত হৈছে। ৰাজ্যজুৰি ২৪,৮৯৭.২৭ হেক্টৰ কৃষিভূমি বানত বিলীন হৈছে।
যোৱা ২৪ ঘণ্টাত ৬ জন লোকৰ মৃত্যু হৈছে, যাৰ ফলত মুঠ মৃতকৰ সংখ্যা ৪৭ জনলৈ বৃদ্ধি পাইছে।১,৩৮,৯৬৫ টা গৰু-ছাগলী তথা পোহনীয়া জীৱ-জন্তু প্ৰভাৱিত হৈছে আৰু ৫০০ টা হাঁহ-কুকুৰাকে ধৰি মুঠ ৫৪০ টা জীৱ-জন্তু উটুৱাই লৈ গৈছে। ৰাজ্যৰ ৫ খন মুখ্য নদী বৰ্তমান বিপদসীমাৰ ওপৰেৰে বৈ আছে। ইয়াৰ ভিতৰত খৌৱাঙৰ বুঢ়ীদিহিং, শিৱসাগৰৰ দিখৌ, নুুমলীগড়ৰ ধনশিৰি (দক্ষিণ), শ্ৰীভূমিৰ কুশিয়াৰা আৰু নাংলামুৰাঘাটৰ দিচাং নদী (যি সৰ্বোচ্চ বান জলস্তৰ বা HFL-ৰ ওপৰেৰে বৈ আছে)।
মুঠ ৪৮৭ টা সাহাৰ্য কেন্দ্র (১০৬ টা সাহাৰ্য শিবিৰ আৰু ৩৮১ টা সাহাৰ্য বিতৰণ কেন্দ্ৰ) স্থাপন কৰা হৈছে। বৰ্তমান ২৪,৪১৮ জন লোকে সাহাৰ্য শিবিৰত আশ্ৰয় লৈ থকাৰ বিপৰীতে ২,৯০,৮২৬ জন লোকক সাহায্য সামগ্ৰী যোগান ধৰা হৈছে। ৮,৪০৯ জন লোক আৰু ৩৫ টা জীৱ-জন্তুক সুৰক্ষিত স্থানলৈ স্থানান্তৰ কৰা হৈছে। উদ্ধাৰ কাৰ্যৰ বাবে ৫৬ খন নাও, ১১১ টা চিকিৎসা দল আৰু ভাৰতীয় বায়ু সেনাৰ (IAF) এটা হেলিকপ্টাৰ মোতায়েন কৰা হৈছে। প্ৰভাৱিত এলেকাবোৰত সাহাৰ্য প্ৰদান আৰু উদ্ধাৰ অভিযান ক্ষিপ্ৰতাৰে অব্যাহত আছে।
