ৰাজস্থানৰ আলৱাৰৰ পৰা পোহৰলৈ আহিছে গণ প্ৰহাৰৰ আন এক কাণ্ড, য’ত হাবিৰ পৰা গছ কটাৰ সন্দেহত তিনিজন মুছলমান যুৱকক আক্ৰমণ কৰি প্ৰহাৰ কৰাৰ ফলত এজন লোকে প্ৰাণ হেৰুৱায়। আলৱাৰৰ বনছুৰ তহচিলৰ ৰামপুৰ অঞ্চলত সংঘটিত হৈছে এই ঘটনা। বনাঞ্চলত অবৈধভাৱে কাঠ কাটিবলৈ গৈ থকা বুলি দাবী কৰি যুৱক তিনিজনক আক্ৰমণ কৰে ৰাইজে। বৃহস্পতিবাৰে (১৮ আগষ্ট) নিশা যুৱককেইজনক আক্ৰমণ চলায়।
খবৰ অনুসৰি তিনিওজন মুছলমান যুৱকক তেওঁলোকৰ পিকআপ জীপত গৈ থকা অৱস্থাত হাবিত প্ৰায় এক ডজন লোকৰ এটা দলে ৰখাই দিয়ে। গছ-গছনি কাটিবলৈ হাবিলৈ যোৱা বুলি সন্দেহ কৰি জীপৰ পৰা উলিয়াই অনাৰ পিছতে যুৱক তিনিজনক আক্রমণ কৰে৷ আশ্চৰ্যজনকভাৱে যুৱক-যুৱতীক আক্ৰমণ কৰা জনসমাগমৰ সৈতে প্ৰায় চাৰিজন বন বিষয়াও আছিল। ইয়াৰ পিছতে আহত যুৱককেইজনক ওচৰৰ চিকিৎসালয়লৈ লৈ যোৱা হয়, য’ত এজনৰ আঘাতত মৃত্যু হয়। চিকিৎসকে তেওঁক মৃত বুলি ঘোষণা কৰে। আহত যুৱককেইজনে চিকিৎসা গ্ৰহণ কৰি আছে। এই সন্দৰ্ভত এক গোচৰ ৰুজু কৰা হৈছে।
মৃত যুৱকজনৰ পিতৃয়ে আৰক্ষীক এজাহাৰ দাখিল কৰিছে। তেওঁৰ অভিযোগত তেওঁ কয় যে তেওঁৰ পুত্ৰ ৱাছিম (২৭) তেওঁৰ দুজন বন্ধু আছিফ আৰু আজহাৰুদ্দিনৰ সৈতে ভ্ৰমণ কৰি আছিল। যেতিয়া নৰোল গাঁৱৰ সমীপত জনসমাগমৰ জীপখন ৰখাই দিলে। তেওঁলোকে আক্ৰমণ কৰি প্ৰহাৰ কৰিছিল যাৰ পিছত তেওঁৰ পুত্ৰই প্ৰাণ হেৰুৱাইছিল। হৰছ’ৰা থানাত দাখিল কৰা হৈছে এই এফআইআৰ। খবৰ অনুসৰি এই গোচৰৰ সৈতে জড়িত প্ৰায় ১০ জন লোকক আৰক্ষীয়ে আটক কৰিছে। ইয়াৰ ভিতৰত আছে আক্ৰমণৰ সময়ত জনসমাগমৰ সৈতে উপস্থিত থকা বুলি অভিযোগ উত্থাপন কৰা চাৰিজন বন বিষয়া।
অতিৰিক্ত আৰক্ষী অধীক্ষক জগৰাম মীনাই এএনআইক জনোৱা মতে, “আমি নৰোল গাঁৱত মব লিঞ্চিঙৰ তথ্য পাইছো আৰু আৰক্ষীয়ে সেই স্থানত উপস্থিত হৈছিল। অভিযুক্তই পলায়ন কৰিছিল। আহতসকলক চিকিৎসালয়লৈ লৈ যোৱা হয় আৰু চিকিৎসাৰ সময়ত এজন লোকৰ মৃত্যু হয়। আমি কেইবাজনকো লৈ গৈছো।” আৰু অধিক তদন্ত চলি আছে।’
