বিয়াৰ মাত্ৰ ৩ দিন পিছতে ভয়ংকৰ পথ দুৰ্ঘটনাত প্ৰাণ হেৰুৱালে এহাল নৱ বিবাহিত দম্পতীয়ে।
বিবাহ সম্পন্ন কৰি দম্পতীহালে ঘৰলৈ ওভতাৰ পথতে সংঘটিত হয় এই মৰ্মান্তিক দুৰ্ঘটনা।
এই শোকাবহ দুৰ্ঘটনা সংঘটিত হয় অন্ধ্ৰপ্ৰদেশৰ বেৰহামপুৰত।
নিহত দম্পতীহালক বেৰহামপুৰৰ নিৱাসী চিএইছ প্ৰণিতা আৰু ইছাপুৰৰ নিৱাসী জি বেনু বুলি চিনাক্ত কৰা হৈছে।
জানিব পৰা মতে, যোৱা ১০ ফেব্ৰুৱাৰীত বিবাহ পাশত আৱদ্ধ হৈছিল প্ৰণিতা আৰু বেণু।
বিয়াৰ তিনিদিন পিছত অৰ্থাৎ সোমবাৰে তেওঁলোকে বাইকেৰে বেৰহামপুৰলৈ উভতি আহিছিল।
কিন্তু দম্পতীহাল অহাৰ পথত গোলানথাৰা আৰক্ষী থানাৰ সন্মুখত এটা টাৰ্ণিং লোৱাৰ সময়তে বিপৰীত দিশৰ পৰা অহা এখন ট্ৰেক্টৰৰ সৈতে মুখামুখি সংঘৰ্ষ ঘটে দম্পতীহালৰ।
এই দুৰ্ঘটনাত গুৰুতৰভাৱে আহত হোৱা প্ৰণিতা আৰু বেণুক স্থানীয় লোকে লগে লগে উদ্ধাৰ কৰি বেৰহামপুৰৰ এম কে চি জি মেডিকেল কলেজ হাস্পতালত ভৰ্তি কৰায়।
কিন্তু হাস্পতালত চিকিৎসাধীন অৱস্থাতে মঙলবাৰে মৃত্যুক সাৱটি লয় দুয়োজনে।
ইফালে এই দুৰ্ঘটনাৰ পিছৰে পৰা পলাতক হৈ আছে ট্ৰেক্টৰ চালকজন।
আৰক্ষীয়ে এটা গোচৰ ৰুজু কৰি চালকজনৰ সন্ধানত অভিযান অব্যাহত ৰাখিছে।
