অলিম্পিকৰ স্বৰ্ণ পদক বিজয়ী জেভলিন থ্ৰ’য়াৰ নীৰজ চোপ্ৰাই ইয়াত প্ৰতিষ্ঠিত ডায়মণ্ড লীগ ফাইনেল জয়ৰে আন এটা ঐতিহাসিক কৃতিত্ব অৰ্জন কৰিছে। চোপ্ৰা হৈছে এই খিতাপ জয় কৰা প্ৰথম ভাৰতীয় খেলুৱৈ। চোপ্ৰাই এটা ফাউলৰ সৈতে আৰম্ভ কৰে কিন্তু শীৰ্ষলৈ যোৱাৰ দ্বিতীয় প্ৰয়াসত ৮৮.৪৪ মিটাৰ দলিয়াইছিল। এইটো তেওঁৰ কেৰিয়াৰৰ চতুৰ্থ শ্ৰেষ্ঠ প্ৰদৰ্শন, যাৰ দ্বাৰা তেওঁ সোণৰ পদক অর্জন কৰে। তেওঁ পৰৱৰ্তী চাৰিটা প্ৰচেষ্টাত ৮৮.০০ মিটাৰ, ৮৬.১১ মিটাৰ, ৮৭.০০ মিটাৰ আৰু ৮৩.৬০ মিটাৰ দলিয়াই। চেক অলিম্পিকৰ ৰূপৰ পদক বিজয়ী জেকব ভাডলেজে ৮৬.৯৪ মিটাৰ শ্ৰেষ্ঠ থ্ৰ’ৰে দ্বিতীয় স্থান লাভ কৰে। তেওঁ চতুৰ্থ প্ৰচেষ্টাত এইটো অর্জন কৰে। জাৰ্মানীৰ জুলিয়ান ৱেবাৰে ৮৩.৭৩ মিটাৰ থ্ৰ’ৰ সৈতে তৃতীয় স্থান লাভ কৰে। নীৰজে বিজয়ৰ পিছত কয়, “আজি ভাদলেজৰ সৈতে প্ৰতিযোগিতাখন খুব ভাল আছিল। তেওঁ ভাল থ্ৰ’ও কৰিছিল। আজি মই ৯০ মিটাৰ লৈকে জেভলিন দলিয়াম বুলি আশা কৰিছিলোঁ কিন্তু মই সুখী যে মোৰ ওচৰত এতিয়া ডায়মণ্ড ট্ৰফী আছে আৰু সেয়া আটাইতকৈ গুৰুত্বপূৰ্ণ।’ ভাৰতৰ ২৪ বছৰীয়া তাৰকাজন এতিয়া অলিম্পিক চেম্পিয়ন, বিশ্ব চেম্পিয়নশ্বিপৰ ৰূপৰ পদক বিজয়ী আৰু ডায়মণ্ড লীগ চেম্পিয়ন। তেওঁ মাত্ৰ ১৩ মাহত এই সকলোবোৰ সাফল্য অৰ্জন কৰিছে। তেওঁ বিগত ৭ আগষ্টত টকিঅ’ত অলিম্পিকৰ সোণৰ পদক জিকিছিল।
চোপ্ৰাই এই ছিজনত ছয়বাৰ ৮৮ মিটাৰতকৈ অধিক দূৰত্বলৈ জেভলিন দলিয়াইছিল, যি তেওঁৰ স্থিৰতা প্ৰতিফলিত কৰিছিল। তেওঁ ৮৯.৯৪ মিটাৰ ৰাষ্ট্ৰীয় অভিলেখ গঢ়িছে, যিটো তেওঁ এই ছিজনত অৰ্জন কৰিছিল। চোপ্ৰাই ইতিহাস সৃষ্টি কৰি তেওঁৰ অধিৱেশনও সমাপ্ত কৰিছিল। ডায়মণ্ড লীগ ফাইনেলক অলিম্পিক আৰু বিশ্ব চেম্পিয়নশ্বিপৰ বাহিৰেও আটাইতকৈ প্ৰতিষ্ঠিত অনুষ্ঠান হিচাপে গণ্য কৰা হয়। চোপ্ৰাই তৃতীয়বাৰৰ বাবে ডায়মণ্ড লীগ ফাইনেলত প্ৰতিদ্বন্দিতা কৰে। তেওঁ পূৰ্বে ২০১৭ আৰু ২০১৮ চনত ক্ৰমান্বয়ে সপ্তম আৰু চতুৰ্থ স্থান লাভ কৰিছিল। হাংগেৰীৰ বুদাপেষ্টত অনুষ্ঠিত হ’বলগীয়া বিশ্ব এথলেটিকছ চেম্পিয়নশ্বিপ ২০২৩ৰ বাবে চোপ্ৰাই ডায়মণ্ড ট্ৰফী, ৩০,০০০ ডলাৰ পুৰস্কাৰ আৰু এটা ৱাইল্ড কাৰ্ড লাভ কৰিছে। অৱশ্যে তেওঁ ইতিমধ্যে বিশ্ব চেম্পিয়নশ্বিপৰ বাবে যোগ্যতা অৰ্জন কৰিছিল।
