ৰোবাষ্টা কফিৰ অধিক চাহিদাৰ বাবে চলিত বছৰৰ জানুৱাৰী-মাৰ্চ সময়ছোৱাত ভাৰতৰ পৰা কফি ৰপ্তানি ১৩.৩৫ শতাংশ বৃদ্ধি হৈ ১,২৫,৬৩১ টন হৈছে। চৰকাৰে এই তথ্য প্ৰদান কৰিছে। ২০২৩ চনৰ একে সময়তে, ভাৰতে ১,১০,৮৩০ টন কফি ৰপ্তানি কৰিছিল। এছিয়াৰ তৃতীয় সৰ্ববৃহৎ উৎপাদক আৰু ৰপ্তানিকৰ্তা ভাৰতে আৰবিকা আৰু ৰোবাষ্টা প্ৰকাৰৰ কফি খেতি কৰে। আৰবিকা কফি বীনত ৰোবাষ্টাতকৈ কম মাত্ৰাত কেফেইন থাকে। আৰবিকাৰ সোৱাদ মিঠা আৰু মসৃণ, আনহাতে ৰোবাষ্টা সাধাৰণতে সোৱাদত অধিক তিতা হয়।ভাৰতীয় কফি ব’ৰ্ডৰ শেহতীয়া তথ্য অনুসৰি, ২০২৪ চনৰ কেলেণ্ডাৰ বৰ্ষৰ প্ৰথম তিনিমাহত ৰোবাষ্টা কফি বীনৰ ৰপ্তানি ১৮ শতাংশ বৃদ্ধি হৈ ৬৯,৬৩৭ টন হৈছে, যি পূৰ্বৰ বছৰ একে সময়ছোৱাত ৫৯,০৫০ টন আছিল। অৱশ্যে, আৰবিকা কফি বীনৰ ৰপ্তানি উক্ত সময়ছোৱাত ১৫,৪৬৮ টনৰ পৰা ১৩,৪১৯ টনলৈ হ্ৰাস পাইছে।
