গোৱালপাৰা – কামাখ্যা সংযোগী ৰেললাইনৰ দীপৰ বিলৰ পাৰৰ চকৰদৌ মিকিৰপাৰাত আজি পুৱাৰ ভাগত উত্তৰ পূব সীমান্ত ৰে’লৱে কৰ্তৃপক্ষই অপৰিকল্পিতভাৱে খন্দা এটা বৃহৎ নলাত হাতী পোৱালি এটা পৰি আহত হোৱা ঘটনাই অঞ্চলটোত তীব্ৰ প্ৰতিক্ৰিয়াৰ সৃষ্টি কৰিছে । জানিব পৰা মতে ৰে’লপথৰ দাতিৰে ট্ৰেফিক ছিগনেলৰ কেৱল লাইন বহুওৱাৰ বাবে মাটি খন্দা কাম চলি আছে। কিন্তু চকদৌ মিকিৰ পাৰাত সেই কেৱল লাইন খন্দা নলাত আজি পুৱাৰ ভাগত এটা হাতী পোৱালি পৰি যায় । লগতে থকা হাতী পোৱালিটোৰ মাকে পাঁচ মিনিটমান ধৰি চেষ্টা চলাই চলোৱা নেৰানেপেৰা প্ৰচেষ্টাৰ অন্তত পোৱালিটোক মাকে ওচৰতে থকা ৰাণী বনাঞ্চলৰ অৰণ্যৰ ভিতৰলৈ লৈ যাবলৈ সক্ষম হয়। প্রাপ্ত খবৰ মতে কালি নিশা ৮/৯ জনীয়া এটা হাতীৰ জাক ৰাণী বনাঞ্চলৰ গভীৰ অৰণ্যৰ পৰা ৰেললাইন পাৰ দীপৰ বিললৈ খাদ্যৰ সন্ধানত গৈছিল । পানীত নামি যোৱা হাতীৰ জাকটো ৰে’লপথ পাৰ হৈ বনাঞ্চললৈ যাতে পুনৰ ঘুৰি যাব পাৰে তাৰ বাবে দীপৰ বিল বন্যপ্রাণী বনাঞ্চলিক বিষয়া কাৰ্যালয়ৰ বনাঞ্চলিক বিষয়া ধনেশ্বৰ দলেৰ নেতৃত্বত এটা বনকৰ্মীৰ দলে মাজনিশাৰ পাছত ৰেললাইনত পহৰা দি আছিল। পুৱা প্ৰায় ১০ মান বজাত হাতীৰ জাকটো ৰে’লপথ পাৰ হয় যদিও জাকৰ শেষত থকা হাতীৰ পোৱালিটো নলাত পৰি যায়। তাৰ পাছত পোৱালি হাতীটোৰ চিঞৰ বাখৰৰ মাজতেই পোৱালিটোৰ মাকে শুৰেৰে মেৰিয়াই ধৰি কৌশলেৰে পোৱালিটেক নলাটোৰ পৰা কৌশলেৰে উঠাই আনিবলৈ সক্ষম হয়। ইপিনে দীপ বিল সুৰক্ষা মঞ্চৰ সভাপতি হেনৰী ডেভিড টেৰণ , সাধাৰণ সম্পাদক প্ৰমোদ কলিতা আৰু সহকাৰী সাধাৰণ সম্পাদক সুশীল টেৰণ , পৰিবেশ কর্মী অনামিকা দাস কলিতাই অভিযোগ কৰা মতে এলিফেণ্ট কৰিডৰ হোৱা স্বত্বেও ৰে’লৱে কৰ্তৃপক্ষই হাতী অহা-যোৱা কৰা বাটত ৰে’ললাইনত ব্যৱহাৰ কৰা কংক্ৰিটৰ শ্লিপাত , নিৰ্মাণ কাৰ্যত ব্যৱহৃত সামগ্ৰী সমুহ ৰাখি থৈ হাতীৰ স্বাভাৱিক চলন ফুৰণত ভেটা দি আহিছে ।
