টিভিএছ মটৰ কোম্পানী-এ ঘৰুৱা আৰু আন্তঃৰাষ্ট্ৰীয় বজাৰত শক্তিশালী চাহিদা, বৈদ্যুতিক বাহনৰ তীব্ৰ বৃদ্ধি আৰু তিনিচকীয়া বাহনৰ বিক্ৰীৰ ব্যাপক উত্থানৰ ওপৰত ভিত্তি কৰি ২০২৬-২৭ বিত্তীয় বৰ্ষৰ প্ৰথমটো ত্ৰৈমাসিকত ১৬.৩১ লাখ ইউনিট বাহন বিক্ৰী কৰি এইপৰ্যন্ত সৰ্বাধিক ত্ৰৈমাসিক বিক্ৰীৰ অভিলেখ গঢ়িছে। কোম্পানীটোৱে ২০২৬ চনৰ জুন মাহতো এতিয়ালৈকে সৰ্বাধিক মাহেকীয়া বিক্ৰী পঞ্জীয়ন কৰিছে; য’ত যোৱা বছৰৰ একে মাহৰ ৪,০২,০০১ ইউনিটৰ তুলনাত এইবাৰ পাইকাৰী বাহন প্ৰেৰণ ৪৭ শতাংশ বৃদ্ধি পাই ৫,৯০,০০৩ ইউনিট হৈছেগৈ।
এপ্ৰিল-জুন মাহৰ এই ত্ৰৈমাসিকত দুচকীয়া বাহনৰ বিক্ৰী পূৰ্বৰ বছৰৰ ১২.৩২ লাখ ইউনিটৰ পৰা ২৭ শতাংশ বৃদ্ধি পাই ১৫.৬৪ লাখ ইউনিট হৈছে। আনহাতে, তিনিচকীয়া বাহনৰ বিক্ৰী ৪৮ শতাংশ বৃদ্ধি পাই ৬৭,০০০ ইউনিট স্পৰ্শ কৰিছে। এই একেটা ত্ৰৈমাসিকতে কোম্পানীটোৰ আন্তঃৰাষ্ট্ৰীয় ব্যৱসায় ৩৩ শতাংশ বৃদ্ধিৰে ৪.৬৮ লাখ ইউনিট হৈ এক নতুন অভিলেখ গঢ়িবলৈ সক্ষম হৈছে। ইয়াৰ লগতে প্ৰতিষ্ঠানটোৱে ১.৩০ লাখ ইউনিট বিক্ৰীৰে সৰ্বাধিক ত্ৰৈমাসিক বৈদ্যুতিক দুচকীয়া বাহন বিক্ৰীৰো সফলতা অৰ্জন কৰিছে।
কেৱল জুন মাহতে ঘৰুৱা বজাৰত দুচকীয়া বাহনৰ বিক্ৰী ৪৬ শতাংশ বৃদ্ধি পাই ৪,১১,০১৪ ইউনিট হৈছে। মটৰচাইকেলৰ বিক্ৰী ৪২ শতাংশ বৃদ্ধিৰে ২,৬৭,০৯৬ ইউনিট হোৱাৰ বিপৰীতে স্কুটী বা স্কুটাৰৰ বিক্ৰী ৫৩ শতাংশ বৃদ্ধিৰে ২,৪৭,৯৫০ ইউনিট হৈছে। আনহাতে বৈদ্যুতিক দুচকীয়া বাহনৰ বিক্ৰী যোৱা বছৰৰ ১৪,৪০০খনৰ তুলনাত এইবাৰ উল্লেখনীয়ভাৱে বৃদ্ধি পাই ৪৮,৫৩৭খন হৈছে। জুন মাহত আন্তঃৰাষ্ট্ৰীয় বিক্ৰী ৪৭ শতাংশ বৃদ্ধিৰে ১,৭২,৩৫৫ ইউনিট আৰু তিনিচকীয়া বাহনৰ বিক্ৰী ৫১ শতাংশ বৃদ্ধিৰে ২৪,৫৮৬খন হৈছেগৈ।
গুৱাহাটী মহানগৰীত টিভিএছ মটৰ্ছৰ এই দেশজোৰা শক্তিশালী বিকাশে অসম তথা সমগ্ৰ উত্তৰ-পূৰ্বাঞ্চলত বাহনৰ চাহিদা অধিক বৃদ্ধি কৰিব বুলি আশা কৰা হৈছে। এই অঞ্চলসমূহত কোম্পানীটোৰ ডীলাৰ নেটৱৰ্ক ক্ৰমান্বয়ে সম্প্ৰসাৰিত হৈছে আৰু মটৰচাইকেল, স্কুটাৰ তথা বৈদ্যুতিক বাহনৰ গ্ৰাহকৰ সংখ্যাও বৃদ্ধি পাইছে। উদ্যোগ বিশেষজ্ঞসকলৰ মতে, এই অভিলেখকাৰী বিক্ৰীৰ গতিয়ে গুৱাহাটীৰ বজাৰত বাহনৰ সহজ উপলব্ধতা নিশ্চিত কৰিব। লগতে আগন্তুক ফেষ্টিভ ছিজনত বাহনৰ চাহিদা বৃদ্ধি পাব আৰু গ্ৰাহকৰ মাজত প্ৰিমিয়াম তথা বৈদ্যুতিক বাহনৰ প্ৰতি আগ্ৰহ অধিক বৃদ্ধি পাব।
