কেন্দ্ৰীয় বিত্ত আৰু কৰ্পোৰেট পৰিক্ৰমা মন্ত্ৰী নিৰ্মলা সীতাৰমণে সংসদত কেন্দ্ৰীয় বাজেট ২০২৩-২০২৪ উপস্থাপন কৰাৰ সময়ত কয় যে যুৱ প্ৰজন্মক শক্তিশালী কৰিবলৈ আৰু ‘অমৃত পীধি’ (Amrit Peedhi)ক তেওঁলোকৰ সপোনবোৰ বাস্তৱায়িত কৰাত সহায় কৰিবলৈ, চৰকাৰে ৰাষ্ট্ৰীয় শিক্ষা নীতি প্ৰস্তুত কৰিছে, দক্ষতাৰ ওপৰত গুৰুত্ব দিছে, অৰ্থনৈতিক নীতি গ্ৰহণ কৰিছে, যিয়ে চাকৰি সৃষ্টিৰ সুবিধা প্ৰদান কৰে আৰু ব্যৱসায়ৰ সুযোগত সমৰ্থন কৰে। কেন্দ্ৰীয় বাজেট ২০২৩-২০২৪-ত সাতটা প্ৰাথমিকতাক গ্ৰহণ কৰা হৈছে, যি ইটো আনটোৰ পৰিপূৰক আৰু অমৃত কালৰ জৰিয়তে দেশৰ যুৱপ্ৰজন্মক পথ প্ৰদৰ্শন কৰা ‘সপ্তঋষি’ হিচাপে কাম কৰে। যুৱ শক্তি হৈছে এক অগ্ৰাধিকাৰ ক্ষেত্ৰ, য’ত দক্ষতা বিকাশ অন্তৰ্ভুক্ত আছে।
বিত্ত মন্ত্ৰীয়ে ঘোষণা কৰিছিল যে অহা তিনি বছৰৰ ভিতৰত লাখ লাখ যুৱক-যুৱতীক দক্ষতা প্ৰদানৰ বাবে প্ৰধানমন্ত্ৰী কৌশল বিকাশ যোজনা ৪.০ আৰম্ভ কৰা হ’ব। আঁচনিখনে অন-জব প্ৰশিক্ষণ, উদ্যোগৰ অংশীদাৰীত্বআৰু উদ্যোগৰ প্ৰয়োজনীয়তাৰ সৈতে পাঠ্যক্ৰমৰ সংগতি থকাটোৰ ওপৰত গুৰুত্ব আৰোপ কৰিব। আঁচনিখনে ইণ্ডাষ্ট্ৰী ৪.০-ৰ বাবে নতুন যুগৰ পাঠ্যক্ৰম যেনে কোডিং, এআই, ৰবটিক্স, মেকাট্ৰনিক্স, আইঅটি, ৩ডি প্ৰিণ্টিং, ড্ৰোন, আৰু ছফট স্কিল সামৰি ল’ব। ৩০টা স্কিল ইণ্ডিয়া আন্তঃৰাষ্ট্ৰীয় কেন্দ্ৰ সমূহ যুৱসকলক দক্ষতা প্ৰদান কৰিবলৈ বিভিন্ন ৰাজ্যত স্থাপন কৰা হ’ব।
মন্ত্ৰীগৰাকীয়ে তিনি বছৰত ৪৭ লাখ যুৱক-যুৱতীক বৃত্তি সমৰ্থন আগবঢ়োৱাৰ বাবে এক সমগ্ৰ ভাৰত National Apprenticeship Promotion Scheme-ৰ অধীনত প্ৰত্যক্ষ লাভালাভ স্থানান্তৰ কৰাৰ কথা ঘোষণা কৰে। সীতাৰমণে জনাইছিল যে এক একত্ৰিত স্কিল ইণ্ডিয়া ডিজিটেল প্লেটফৰ্ম মুকলি কৰাৰ লগে লগে দক্ষতাৰ বাবে ডিজিটেল পৰিস্থিতিতন্ত্ৰ আৰু সম্প্ৰসাৰিত কৰা হ’ব।
