পেৰুৰ লিমাস্থিত ভাৰতীয় দূতাবাসে শেহতীয়াকৈ ভাৰত চৰকাৰে অসমীয়া, বাংলা, মাৰাঠী, পালি আৰু প্ৰাকৃত ভাষাক ‘ধ্ৰুপদী ভাষা’ ৰূপে স্বীকৃতি প্ৰদান উদযাপন কৰে।
এই শেহতীয়া স্বীকৃতিৰে ভাৰতত এতিয়া ধ্ৰুপদী ভাষাৰ সংখ্যা ১১লৈ বৃদ্ধি পালে। এই স্বীকৃতিক সন্মান জনাই বিশ্বজুৰি বিস্তৃত ভাৰতীয় দূতাবাসসমূহে প্ৰাণৱন্ত সাংস্কৃতিক অনুষ্ঠানৰ আয়োজন কৰিছে। লিমাত এই উদযাপন বিশেষভাৱে অনন্য আছিল, এই অনুষ্ঠানত স্থানীয় ভাৰতীয় সম্প্ৰদায় আৰু প্ৰবাসী ভাৰতীয়সকলে পেৰুৰ বিশিষ্ট অতিথিসকলৰ সৈতে উৎসাহেৰে অংশগ্ৰহণ কৰে। এই বৰ্ণিল অনুষ্ঠানত উপস্থিতসকলে ভাৰতীয় মূলৰ ব্যক্তিসকলে উপস্থাপন কৰা বিভিন্ন আকৰ্ষণীয় সাংস্কৃতিক প্ৰদৰ্শন উপভোগ কৰে।
এই অনুষ্ঠানে বিভিন্ন অনুষ্ঠানৰ জৰিয়তে এই ভাষাসমূহৰ ঐতিহাসিক তাৎপৰ্য আৰু দীৰ্ঘদিনীয়া সাংস্কৃতিক প্ৰভাৱৰ ওপৰত আলোকপাত কৰিছিল।
ভাৰত চৰকাৰৰ এই সিদ্ধান্তৰ প্ৰয়োজনীয়তাৰ ওপৰত গুৰুত্ব আৰোপ কৰি ভাৰতীয় ৰাষ্ট্ৰদূত বিকাশ চপকালৰ উদ্বোধনী ভাষণ প্ৰদান কৰে। এই স্বীকৃতি প্ৰদানে কেনেদৰে শৈক্ষিক গৱেষণা পুঁজি আৰু অন্যান্য ধৰণৰ চৰকাৰী সাহায্যৰ জৰিয়তে এই ভাষাবোৰক সহায় কৰিব, এই স্বীকৃতিৰ বলত প্ৰাচীন ভাষাসমূহৰ বিকাশ আৰু সংৰক্ষণক উৎসাহিত কৰিব সেই বিষয়ে বিশদভাৱে ৰাষ্ট্ৰদূতগৰাকীয়ে উল্লেখ কৰে। ৰাষ্ট্ৰদূত চপকালে দেশৰ ভাষিক বৈচিত্ৰ্য আৰু এই ভাষাসমূহ চৰ্চা অব্যাহত ৰখাৰ প্ৰতিশ্ৰুতিৰ অংশ হিচাপে আঞ্চলিক ভাষাসমূহৰ প্ৰচাৰৰ বাবে ভাৰতৰ সমৰ্পিত প্ৰচেষ্টাৰ ওপৰতো আলোকপাত কৰে।
এই অনুষ্ঠানৰ সময়ত বাংলা আৰু মাৰাঠী জনগোষ্ঠীয় লোকসকলে নিজৰ নিজৰ ভাষাৰ চহকী ঐতিহ্য, ভাৰতৰ স্বাধীনতা সংগ্ৰামত অনুপ্ৰেৰণাদায়ক ভূমিকা, আঞ্চলিক ভাষাসমূহৰ উল্লেখযোগ্য লেখক-সাহিত্যিক আৰু বঁটা বিজয়ী ব্যক্তিসকলৰ অৱদানৰ বিষয়ে অন্তৰ্দৃষ্টি ভাগ-বতৰা কৰে। অসম, পশ্চিমবংগ, মহাৰাষ্ট্ৰৰ পৰম্পৰাগত নৃত্যই অনুষ্ঠানটো আৰু অধিক প্ৰাণৱন্ত কৰি তোলে। ভাৰতৰ ভাষা, সংগীত আৰু চহকী সাংস্কৃতিক বৈচিত্ৰ্যৰে অনুৰণিত হৈ গভীৰভাৱে আপ্লুত হৈ পৰে। এই অনুষ্ঠানত ভাৰতীয় সম্প্ৰদায় আৰু পেৰুৰ ১০০ৰো অধিক অতিথিয়ে অংশগ্ৰহণ কৰে।
