গুৱেৰ্নিকাৰ বেনাৰত ২০১০ চনত হিমাংশু প্ৰসাদ দাসৰ ৰচনা আৰু পৰিচালনাৰে মঞ্চস্থ নাটক ‘মই শ্বাহৰুখ খান হ’ব খোজো’ৰ কাহিনীৰ আধাৰত নিৰ্মাণ কৰা হৈছে নতুন অসমীয়া কথাছবি ‘হিৰো’। অহা ২৬ ফেব্ৰুৱাৰী শনিবাৰে জ্যোতি চিত্ৰবনত তিনিটা বিশেষ দৰ্শনীৰ ব্যৱস্থা কৰা হৈছে ‘হিৰো’ৰ।
ইয়াৰ উপৰি কথাছবিখন জনপ্ৰিয় ওটিটি প্লেটফৰ্ম ৰীলড্ৰামাৰ জৰিয়তে দৰ্শকৰ বাবে মুকলি কৰি দিব বুলি জানিবলৈ দিছে কথাছবিখনৰ পৰিচালক হিমাংশুপ্ৰসাদ দাসে। এই চিনেমাখনত মুখ্য চৰিত্ৰত অভিনয় কৰিছে যুৱ প্ৰজন্মৰ প্ৰতিশ্ৰুতিসম্পন্ন অভিনেতা চন্দন দাস আৰু অভিনেত্ৰী সন্ধ্যা হাজৰিকাই। ইয়াৰ লগতে অতি গুৰুত্বপূৰ্ণ কেইবাটাও চৰিত্ৰত অভিনয় কৰিছে অসমৰ অভিনয় জগতৰ খ্যাতনামা অভিনেতা অৰুণ হাজৰিকা, জ্যোতি নাৰায়ন নাথ, অসীম কৃষ্ণ বৰুৱা, সিদ্ধাৰ্থ মুখাৰ্জী, আৰু প্ৰনামী বৰা আদিয়ে। চিনেমাখনৰ চিত্ৰনাট্য আৰু সংলাপ ৰচনা কৰিছে মহৰ্ষি তুহিন কাশ্যপ আৰু হিমাংশু প্ৰসাদ দাসে। ভাৰতৰ অন্যতম জনপ্ৰিয় ওটিটি প্লেটফৰ্ম ৰীলড্ৰামাৰ হৈ এই চিনেমাখন প্ৰযোজনা কৰিছে কুহেলী দাসগুপ্তা আৰু সুমিত দাসগুপ্তাই।শব্দ সংযোজন ৰুক্মজিত বৰুৱাৰ।মুখ্য সহকাৰী পৰিচালক জিতুল ৰাজবংশী আৰু প্ৰযোজনা নিয়ন্ত্ৰক কমল পৰাণ।
