গড্ৰেজ কনজিউমাৰ প্ৰডাক্টছ লিমিটেড(জিচিপিএল)-এ কোম্পানীসমূহক নতুন কৰ ব্যৱস্থাৰ অধীনত জমা হোৱা ন্যূনতম বিকল্প কৰ (মেট) ক্ৰেডিটৰ বিপৰীতে তেওঁলোকৰ কৰ দায়বদ্ধতাৰ ২৫ শতাংশ পৰ্যন্ত মূল্য নিৰ্ধাৰণ কৰাৰ অনুমতি দিয়া কেন্দ্ৰীয় বাজেটৰ ব্যৱস্থাটোক আদৰণি জনাই ইয়াক কৰ্পৰেট ভাৰতৰ বাবে এক ইতিবাচক পদক্ষেপ বুলি অভিহিত কৰিছে। গড্ৰেজ কনজিউমাৰ প্ৰডাক্টছ লিমিটেডৰ পৰিচালন সঞ্চালক তথা মুখ্য কাৰ্যবাহী বিষয়া সুধীৰ সীতাপতিয়ে নিজৰ অভিমত ব্যক্ত কৰি কয় যে, এই পদক্ষেপে লিগেচি মেট ক্ৰেডিট বহন কৰা কোম্পানীসমূহৰ বাবে নতুন কৰ গাঁথনিলৈ পৰিৱৰ্তন যথেষ্ট সহজ কৰি তুলিব।
“নতুন কৰ ব্যৱস্থাৰ অধীনত কৰ দায়বদ্ধতাৰ ২৫ শতাংশলৈকে অনুমতি দিয়া মেট ক্ৰেডিট ছেট-অফ ব্যৱস্থাক আমি বিশেষভাৱে আদৰণি জনাইছোঁ। এই পদক্ষেপে নগদ ধনৰ প্ৰবাহ বৃদ্ধি কৰাৰ লগতে সঞ্চিত ঋণ থকা প্ৰতিষ্ঠানসমূহৰ বাবে নতুন কৰ ব্যৱস্থাই মসৃণ কৰি তুলিব”, সীতাপতিয়ে এক বিবৃতিত এইদৰে কয়।
তেওঁ লগতে কয় যে,বাজেটত নীতিৰ পৰিৱৰ্তনে বান্ধ খাই থকা মূলধন আনলক কৰাত সহায় কৰিব, যাৰ ফলত প্ৰতিষ্ঠানসমূহে পুঁজি পুনৰ বিনিয়োগ আৰু সম্প্ৰসাৰণৰ দিশত গুৰুত্ব দিব পাৰিব। তেওঁ প্ৰকাশ কৰা অনুসৰি, উন্নত তাৰল্যতাই বৃদ্ধিত সহায় কৰিব বুলি আশা কৰা হৈছে, বিশেষকৈ ভাৰতৰ দ্ৰুতগতিত আগবাঢ়ি যোৱা গ্ৰাহক উপভোক্তা সামগ্ৰী খণ্ডৰ মেৰুদণ্ড গঠন কৰা ব্যৱহাৰ-কেন্দ্ৰিক শিতানসমূহে নতুন মাত্ৰা লাভ কৰিব। ন্যূনতম বিকল্প কৰ ক্ৰেডিট সকাহে অধিক কোম্পানীক নতুন কৰ ব্যৱস্থালৈ স্থানান্তৰিত হ’বলৈ উৎসাহিত কৰাৰ সম্ভাৱনা আছে, যি চৰকাৰৰ বিস্তৃত লক্ষ্যৰ সৈতে সংগতি ৰাখিছে যাতে বিনিয়োগ আৰু অৰ্থনৈতিক বৃদ্ধিত সহায় কৰাৰ লগতে কৰ ব্যৱস্থা সৰল হয়।
