সমগ্ৰ দেশত ইলেক্ট্ৰিক বাহন (ইভি)ক আঁকোৱালি পৰিৱেশৰ প্ৰতি ইতিবাচক সঁহাৰি প্ৰদান কৰি বহনক্ষম সামগ্ৰী পৰিবহনৰ বাবে বাজাজ অটো লিমিটেড আৰু ফ্লিপকাৰ্টে কৌশলগত অংশীদাৰিত্বৰ কথা ঘোষণা কৰিছে। এই সহযোগিতা ভাৰতীয় ই-কমাৰ্চৰ পৰিৱেশত এক সেউজ ভৱিষ্যতৰ দিশে উল্লেখযোগ্য পদক্ষেপ ৰূপে চিহ্নিত হৈছে।
২০২৪ৰ বৰ্ষৰ ১০ মে’ত এই সন্দৰ্ভত বাজাজ অটো আৰু ফ্লিপকাৰ্টৰ মাজত স্বাক্ষৰিত হয় বুজাবুজিৰ চুক্তি, এই সহযোগিতাই দুয়োটা প্ৰতিষ্ঠানৰ মাজত স্থাপন কৰিছে দীৰ্ঘম্যাদী ব্যৱসায়িক অংশীদাৰিত্ব। ফ্লিপকাৰ্টলৈ ন্যুনতম ১০০০খন অত্যাধুনিক বৈদ্যুতিক তিনিচকীয়া বাহন যোগান ধৰাৰ প্ৰাৰম্ভিক প্ৰতিশ্ৰুতিয়ে ভৱিষ্যতৰ সহযোগিতা আৰু সম্ভাৱ্য বাহন সম্প্ৰসাৰণৰ ভিত্তি গঢ়ি তুলিলে। এই বুজাবুজি চুক্তিয়ে দুয়োটা প্ৰতিষ্ঠানৰ মাজত সফল অংশীদাৰিত্বৰ ভেটি স্থাপন কৰিলে। এই সহযোগিতাৰ বিষয়ে বাজাজ অটো লিমিটেডৰ এগৰাকী মুখপাত্ৰ সমৰদীপ সুবন্ধে কয় যে, “বাজাজ কাৰ্গো ইটিইচিসমূহ অভিনৱ ডিজাইন আৰু সুবিধাৰে চালিত আৰু বৰ্তমানলৈ শ্ৰেণীটোৰ ভিতৰতে সৰ্বশ্ৰেষ্ঠ প্ৰদৰ্শন আৰু নিৰ্ভৰযোগ্যতা প্ৰদান কৰিব পৰাকৈ প্ৰস্তুত কৰা হৈছে, যিবোৰে বজাৰত দ্ৰুত গ্ৰহণযোগ্যতা লাভ কৰিছে”।
ফ্লিপকাৰ্টে নিজৰ শেষ প্ৰান্তলৈ ডেলিভাৰী প্ৰদানৰ বাবে বাজাজৰ উন্নত ইভি প্ৰযুক্তি কাৰ্যকৰী কৰি দক্ষতা আৰু বহনক্ষমতা উন্নত কৰিবলৈ সাজু হৈছে। ফ্লিপকাৰ্ট গ্ৰুপৰ গ্ৰাহক অভিজ্ঞতা আৰু পুনৰ-বাণিজ্যৰ জ্যেষ্ঠ উপাধ্যক্ষ তথা যোগান শৃংখলাৰ মুৰব্বী হেমন্ত বদ্ৰীয়ে কয় যে, “শেহতীয়া প্ৰযুক্তি ব্যৱহাৰ কৰি আৰু এনেধৰণৰ কৌশলগত অংশীদাৰীত্ব গঢ়ি তুলি আমি কাৰ্যকৰী দক্ষতা বৃদ্ধি কৰাৰ লগতে এক সেউজ আৰু অধিক বহনক্ষম ভৱিষ্যতৰ পথ প্ৰশস্ত কৰিছোঁ।”
