দেশৰ সৰ্বোচ্চ অসামৰিক বঁটা ভাৰত ৰত্নৰে সন্মানিত হ’ব ভাৰতীয় জনতা পাৰ্টিৰ প্ৰবীণ নেতা তথা প্ৰাক্তন উপ-প্ৰধানমন্ত্ৰী এল কে আদৱানী। আজি প্ৰধানমন্ত্ৰী নৰেন্দ্ৰ মোদীয়ে এই ঘোষণা কৰে । তেওঁ কয় যে দেশৰ উপ-প্ৰধানমন্ত্ৰী এল কে আদৱানীক দেশৰ সৰ্বোচ্চ অসামৰিক বঁটা ভাৰত ৰত্ন প্ৰদান কৰা হ’ব।
প্ৰধানমন্ত্ৰীয়ে ছচিয়েল মিডিয়া এক্সত লিখে যে আমাৰ সময়ৰ অন্যতম সন্মানীয় ৰাজনৈতিক নেতা আদৱানীয়ে ভাৰতৰ উন্নয়নত যথেষ্ট অৱদান আগবঢ়াইছে। তেওঁ তৃণমূল পৰ্যায়ত কাম কৰাৰ পৰা আমাৰ উপ-প্ৰধানমন্ত্ৰী হিচাপে দেশৰ সেৱা কৰালৈকে জীৱন আৰম্ভ কৰিছিল। প্ৰধানমন্ত্ৰীয়ে কয় যে ৯৬ বছৰীয়া আদৱানীক এই সন্মান প্ৰদান কৰা হ’ব বুলি ঘোষণা কৰি তেওঁ আনন্দিত।
প্ৰধানমন্ত্ৰী মোদীয়ে আটাইতকৈ দীঘলীয়া সময়ধৰি বিজেপি সভাপতিৰ আসন শুৱনি কৰা আদৱানীৰ সৈতে এই সন্দৰ্ভত কথা পাতি তেওঁক অভিনন্দন জনায়। প্ৰাক্তন প্ৰধানমন্ত্ৰী অটল বিহাৰী বাজপেয়ীৰ নেতৃত্বত মিত্ৰজোঁট চৰকাৰৰ এটা মুখ্য দল হিচাপে প্ৰথমবাৰৰ বাবে শাসনলৈ অহাৰ সময়ত ৯০ ৰ দশকত বিজেপিৰ উত্থানৰ কৃতিত্ব আদৱানীক দিয়া হয়।
