ইণ্ডিয়ান ফাৰ্মাৰ্ছ ফাৰ্টিলাইজাৰ কো-অপাৰেটিভ চমুকৈ আইএফএফচিঅ’ই ত্ৰিভুৱন সহকাৰী বিশ্ববিদ্যালয় বিধেয়ক ২০২৫ৰ অনুমোদনক আদৰণি জনাইছে আৰু ইয়াক গ্ৰাম্য অৰ্থনীতি আৰু সমবায় খণ্ডক শক্তিশালী কৰাৰ এক যুগান্তকাৰী পদক্ষেপ বুলি অভিহিত কৰিছে। ২৬ মাৰ্চত লোকসভাত গৃহীত হোৱা এই বিধেয়কখন ভাৰতৰ প্ৰথমখন সমবায় বিশ্ববিদ্যালয় ৰূপে অভিহিত হৈছে, যাৰ লক্ষ্য হৈছে এই খণ্ডত আত্মনিয়োগ, উদ্যমিতা আৰু পেছাদাৰী বিকাশ বৃদ্ধি কৰা। কেন্দ্ৰীয় সমবায় আৰু গৃহ পৰিক্ৰমা বিভাগৰ মন্ত্ৰী অমিত শ্বাহে বিধেয়কখন ঘোষণা কৰাৰ সময়ত কয় যে, ই উদ্ভাৱন, গৱেষণা আৰু সমবায়কেন্দ্ৰিক নেতৃত্বৰ ক্ষেত্ৰত নতুন মানদণ্ড স্থাপন কৰিব। মন্ত্ৰী শ্বাহে গুৰুত্ব আৰোপ কৰে যে এই পদক্ষেপ চৰকাৰৰ ‘সহকাৰ চে সমৃদ্ধি’ (সহযোগিতাৰ জৰিয়তে সমৃদ্ধি)ৰ লক্ষ্যৰ সৈতে সংগতি ৰাখে আৰু যিয়ে স্থানীয়ৰ পৰা গোলকীয় পৰ্যায়লৈ সমবায়সমূহক শক্তিশালী কৰিব।
আইএফএফচিঅ’ৰ পৰিচালনা সঞ্চালক ড০ উদয় শংকৰ অৱস্থীয়ে এই পদক্ষেপৰ প্ৰশংসা কৰি ইয়াক ভাৰতীয় কৃষি, কৃষক আৰু গ্ৰাম্য উন্নয়নৰ বাবে এক ঐতিহাসিক পদক্ষেপ বুলি অভিহিত কৰে। অৱস্থীয়ে উল্লেখ কৰে যে, বিশ্ববিদ্যালয়খনে খণ্ড-নিৰ্দিষ্ট পাঠ্যক্ৰম আৰু হ্ৰস্বম্যাদী প্ৰশিক্ষণ কাৰ্যসূচী আগবঢ়াব, যাৰ ফলত সমবায় কৰ্মচাৰী আৰু পেছাদাৰীসকল উপকৃত হ’ব। আইএফএফচিঅ’ৰ অধ্যক্ষ দিলীপ সংঘানীয়ে লগতে কয় যে বিশ্ববিদ্যালয়খনে পৰৱৰ্তী প্ৰজন্মৰ সহযোগিতামূলক নেতৃবৃন্দকক আগুৱাই নিব, যিয়ে এই খণ্ডটোত বহনক্ষম বিকাশ নিশ্চিত কৰিব।
বছৰি ৮ লাখৰো অধিক প্ৰাৰ্থীক প্ৰশিক্ষণ দিয়াৰ আশা কৰা বিশ্ববিদ্যালয়খনে সমবায় মন্ত্ৰালয়ৰ নিৰ্দেশনাত বিকশিত পাঠ্যক্ৰমৰ সৈতে সমবায় শিক্ষা আৰু গৱেষণাৰ কেন্দ্ৰ হিচাপে কাম কৰিব। আন্তঃৰাষ্ট্ৰীয় সমবায় মিত্ৰতা(কো-অপাৰেটিভ এলায়েঞ্চ)ৰ সঞ্চালক প্ৰধান জেৰ’এন ডগলাছে এই পদক্ষেপক আদৰণি জনাই ইয়াক বিশ্ব সমবায় আন্দোলনক শক্তিশালী কৰাৰ দিশত এক গুৰুত্বপূৰ্ণ পদক্ষেপ বুলি অভিহিত কৰে।
