মহিন্দ্ৰা এণ্ড মহিন্দ্ৰা লিমিটেডে বৃহস্পতিবাৰে প্ৰথমখন মূলসুঁতিৰ চিএনজি যাত্ৰীবাহী বাহন এক্সইউভি ৩এক্সঅ’ জেডএনজি মুকলি কৰিছে, বাহনখনৰ মূল্য ৯.৯৯ লাখ টকা (এক্স-শ্ব’ৰুম)ৰ পৰা আৰম্ভ হৈছে। চিএনজি এছইউভি খণ্ডত কোম্পানীটোৰ উপস্থিতি শক্তিশালী কৰিবলৈ এই নতুন মডেলটোত টাৰ্বোচাৰ্জড্ কাৰ্যক্ষমতা, ইন্ধনৰ মিতব্যয়িতা, উন্নত প্ৰযুক্তি আৰু সুৰক্ষা সুবিধাসমূহ একত্ৰিত কৰা হৈছে।
এটা ১.২ লিটাৰ mStallion টাৰ্বোচাৰ্জড্ ইঞ্জিনৰ দ্বাৰা চালিত এক্সইউভি ৩এক্সঅ’ জেডএনজি বাহনখনে চিএনজি আৰু পেট্ৰ’ল দুয়োটা মোডতে ৮২ কিলোৱাট শক্তি আৰু ২০০ এনএম টৰ্ক প্ৰদান কৰে। বাহনখনে প্ৰতি কেজিত ২৪.৭ কিলোমিটাৰ প্ৰমাণিত ইন্ধনৰ মিতব্যয়িতা প্ৰদান কৰাৰ সমান্তৰালভাৱে চিএনজি মোডত মাত্ৰ ৪.৯ ছেকেণ্ডত ০-৬০ কিলোমিটাৰ/ঘণ্টা বেগ ল’ব পাৰে। এই বাহনখনৰ টুইন-চিলিণ্ডাৰ চিএনজি প্ৰণালীটো লাগেজ ৰখা ঠাইৰ তলত স্থাপন কৰা হৈছে, যাৰ ফলত চেপেটা মজিয়া আৰু ২৭০ লিটাৰৰ ব্যৱহাৰ উপযোগী বুট স্পেচ সংৰক্ষিত হৈ থাকে।
বাহনখনৰ সকলো ভেৰিয়েণ্টতে উপলব্ধ থকা সুৰক্ষা সুবিধাসমূহৰ ভিতৰত আছে ৬টা এয়াৰবেগ, ইলেক্ট্ৰনিক ষ্টেবিলিটি কণ্ট্ৰ’ল আৰু আইচ’ফিক্স চাইল্ড-ছীট মাউণ্ট। এছইউভিখনত গেছ-লিক ধৰা পেলোৱা প্ৰযুক্তিও সন্নিৱিষ্ট কৰা হৈছে, যিয়ে কোনো লিক বা গেছ ওলোৱা ধৰা পৰিলে বাহনখন স্বয়ংক্ৰিয়ভাৱে পেট্ৰ’ল মোডলৈ সলনি কৰি দিয়ে। বৰ্তমান বজাৰত উপলব্ধ এক্সইউভি ৩এক্সঅ’ মডেলটোৱে প্ৰাপ্তবয়স্ক আৰু শিশু যাত্ৰীৰ সুৰক্ষাৰ বাবে ফাইভ-ষ্টাৰ ভাৰত এনচিপি ৰেটিং লাভ কৰিছে।
এই মডেলটো ৪টা ভেৰিয়েণ্টত পোৱা যাব, যাৰ মূল্য ৯.৯৯ লাখ টকাৰ পৰা ১২.২৭ লাখ টকাৰ ভিতৰত উপলব্ধ। বাহনখনৰ টেষ্ট ড্ৰাইভ ১৫ অক্টোবৰৰ পৰা আৰম্ভ হৈছে, আনহাতে বুকিং আৰু ডেলিভাৰী ২০ অক্টোবৰৰ পৰা আৰম্ভ হ’ব।
মহিন্দ্ৰা এণ্ড মহিন্দ্ৰাৰ অটোম’টিভ ব্যৱসায় খণ্ডৰ অধ্যক্ষ ড° ভেলুচামি আৰ-এ কয় যে, এই বাহনখনৰ উদ্দেশ্য হৈছে চিএনজিৰ ব্যৱহাৰিকতা আৰু কম পৰিচালনা ব্যয়ৰে এখন এছইউভিৰ পৰা প্ৰত্যাশিত কাৰ্যক্ষমতা, প্ৰযুক্তি আৰু সুৰক্ষাক একত্ৰিত কৰা।
