গোৱালপাৰা জিলাৰ পাইকান সংৰক্ষিত বনাঞ্চলত বৃহস্পতিবাৰে বেদখল বিৰোধী অভিযানত নিৰাপত্তাৰক্ষী আৰু উচ্ছেদিত লোকৰ মাজত সংঘৰ্ষত কমেও এজন লোক নিহত হোৱাৰ লগতে আৰক্ষীকে ধৰি কেইবাজনো লোক আহত হয়। এজনবিষয়াই জনোৱা মতে, বনৰক্ষী আৰু আৰক্ষীক লাঠিৰে আক্ৰমণ কৰে অভিযুক্ত বেদখলকাৰীয়ে। এই লোকসকলে পাইকান সংৰক্ষিত বনাঞ্চলৰ এটা অংশ ঘেৰাও কৰিবলৈ গৈছিল, য’ত শনিবাৰে বেদখল বিৰোধী অভিযান চলোৱা হৈছিল।
উচ্ছেদ কৰা লোকসকলে বনৰক্ষী আৰু আৰক্ষীৰ ওপৰতো শিলগুটি নিক্ষেপ কৰে বুলি বিষয়াগৰাকীয়ে জানিবলৈ দিয়ে। তেওঁ কয় যে পৰিস্থিতি নিয়ন্ত্ৰণৰ বাবে আৰক্ষীয়ে গুলীচালনা কৰিবলগীয়া হৈছিল, য’ত এজন লোকৰ মৃত্যু হোৱাৰ লগতে আন দুজন লোক আহত হয়। বিষয়াগৰাকীয়ে জানিবলৈ দিয়া মতে, শিলগুটি নিক্ষেপত কেইবাজনো আৰক্ষী আৰু বনকৰ্মী আহত হয়। প্ৰাৰম্ভিক খবৰ অনুসৰি ১২ জুলাইৰ বেদখল বিৰোধী অভিযানত ক্ষতিগ্ৰস্ত লোকে এই আক্ৰমণ সংঘটিত কৰিছিল।
