শুকুৰবাৰে নতুন দিল্লী-ৰাজগীৰ শ্ৰামজীৱী এক্সপ্ৰেছ (১২৩৯২) ৰে’লৰ ডবাৰ শৌচাগাৰত মৃত অৱস্থাত উদ্ধাৰ হয় এগৰাকী ২৫ বছৰীয়া যুৱতী। বিহাৰৰ ৰাজগীৰ ৰেল ষ্টেচনত ৰে’লখন পৰিস্কাৰ কৰাৰ সময়তে যুৱতীগৰাকীৰ মৃতদেহ উদ্ধাৰ হয়। ইচি১৬৪১৪চি নম্বৰৰ ডবাটোৰ এটা শৌচাগাৰৰ ভিতৰত বহি থকা অৱস্থাত মৃতদেহটো দেখা পায় চাফাই কৰ্মীসকলে। লগে লগে জি আৰ পি আৰু আৰ পি এফলৈ এই তথ্য প্ৰেৰণ কৰে। ৰাতিপুৱা ১০:৩০ বজাত ৰাজগীৰ ৰেলৱে ষ্টেচনত উপস্থিত হয় আৰু তাৰ পিছত প্ৰায় ১১:৩০ বজাত পিট লাইন অংশত উপস্থিত হয় ৰে’লখন।
আৰক্ষীয়ে সেই স্থানত উপস্থিত হোৱাৰ লগে লগে শৌচাগাৰৰ ভিতৰত ক’ম’ডত বহি থকা অৱস্থাত মৃতদেহটো ডিঙিত এটা মূৰৰ পৰা ‘দুপট্টা’ (স্কাৰ্ফ) বান্ধি ৰখাৰ বিপৰীতে আনটো মূৰ হেংগাৰেৰে বান্ধি থোৱা অৱস্থাত উদ্ধাৰ কৰে।
“মহিলাগৰাকীৰ চিনাক্তকৰণ এতিয়াও নিশ্চিত হোৱা নাই। আমি মৃতদেহটো মৰণোত্তৰ পৰীক্ষাৰ বাবে পঠিয়াইছো। তেওঁক হত্যা কৰা যেন লাগে, আৰু কোনোবাই আত্মহত্যাৰ দৰে উপস্থাপন কৰিবলৈ চেষ্টা কৰিছে। বৰ্তমান তদন্ত চলি আছে।” বিষয়াই কয়।
