পুনৰ এবাৰ ক্ৰিকেটৰ জ্বৰত আক্রান্ত হ’ব দেশৰ ক্ৰিকেটপ্ৰেমী। ভাৰতত ক্ৰিকেট উৎসৱৰূপে পৰিগণিত ইণ্ডিয়ান প্ৰিমিয়াৰ লীগ আকৌ এবাৰ আৰম্ভ হ’বলৈ আগবাঢ়িছে। এইবাৰ আই পি এল ৩১ মাৰ্চৰ পৰা আৰম্ভ হ’ব আৰু প্ৰথমখন খেল আই পি এল ২০২২ ট্ৰফী বিজয়ী গুজৰাট টাইটানছ আৰু চাৰিবাৰৰ আই পি এল চেম্পিয়ন চেন্নাই ছুপাৰ কিংছৰ মাজত অনুষ্ঠিত হ’ব। আই পি এলৰ প্ৰথম আৰু অন্তিমখন খেল আহমেদাবাদৰ নৰেন্দ্ৰ মোডী ষ্টেডিয়ামত অনুষ্ঠিত হ’ব। এই ছিজনত মুঠ ৭৪ খন খেল খেলা হ’ব। ইয়াৰ ভিতৰত, লীগ পৰ্যায়ত ৭০ খন মেচ আৰু প্লে অফত ৪ খন মেচ খেলা হ’ব। সকলো দলে ১৪খনকৈ মেচ খেলিব, যাৰ ভিতৰত ৭ খন তেওঁলোকৰ ঘৰুৱা খেলপথাৰত আৰু ৭ খন বিপক্ষ দলৰ খেলপথাৰত খেলা হ’ব। ক’ভিড-১৯ৰ প্ৰতি লক্ষ্য ৰাখি বিচিচিআইয়ে যোৱা আইপিএল ছিজনৰ খেলসমূহ সীমিত খেলপথাৰত আয়োজন কৰিছিল। অৱশ্যে, এইবাৰ দীৰ্ঘ সময়ৰ পিছত, আই পি এল পুনৰ পুৰণি শৈলীত খেলা হ’ব। উল্লেখ্য যে আই পি এল ২০২২ বৰ্ষত সুন্দৰ প্ৰদৰ্শন কৰা খেলা সঞ্জু চেমছনৰ দল ৰাজস্থান ৰয়েলছে চূড়ান্ত খেলখনত গুজৰাট টাইটানছৰ হাতত পৰাজয়ৰ সন্মুখীন হ’বলগীয়া হৈছিল। এইবাৰ ৰাজস্থানে ২ এপ্ৰিলত ছানৰাইজাৰ্ছ হায়দৰাবাদৰ বিৰুদ্ধে তেওঁলোকৰ অভিযান আৰম্ভ কৰিব।
