স্পিনাৰ ৱানিন্দু হাচাৰাঙ্গাৰ নেতৃত্বত সুন্দৰ বলিং আৰু ধনঞ্জয়া ডি চিলভাৰ অৰ্ধশতকৰ সহায়ত আজি ইয়াত অনুষ্ঠিত টি-২০ বিশ্বকাপৰ ছুপাৰ-১২ খেলত শ্ৰীলংকাই নটা বল বাকী থকা অৱস্থাত আফগানিস্তানক ছয় উইকেটত পৰাস্ত কৰে। যদিও শ্ৰীলংকাই এই জয়ৰ সৈতে ছেমি ফাইনেলত উপনীত হোৱাৰ আশা সজীৱ ৰাখিছে, আফগানিস্তানে কিন্তু ছেমি ফাইনেলৰ দৌৰৰ পৰা বাহিৰ হৈছে।
আফগানিস্তানে টছত জিকি প্ৰথমে বেটিং কৰে আৰু ভাল আৰম্ভণি কৰে কিন্তু তাৰ পিছত তেওঁলোকে নিয়মীয়া ব্যৱধানত উইকেট হেৰুৱাই। তেওঁলোকৰ দলটোৱে শেষত আঠটা উইকেটৰ বিনিময়ত মাত্ৰ ১৪৪ ৰানহে অর্জন কৰিবলৈ সক্ষম হয়। অপেনাৰ ৰহমানুল্লাহ গুৰবাজে ২৮ ৰান আৰু উছমান ঘানিয়ে ২৭ ৰান সংগ্ৰহ কৰে। শ্ৰীলংকাৰ হৈ হাচাৰঙ্গাই চাৰি অভাৰত ১৩ ৰানত তিনিটা উইকেট দখল কৰাৰ বিপৰীতে ফাষ্ট বলাৰ লাহিৰু কুমাৰাই চাৰি অভাৰত ৩০ ৰানত দুটা উইকেট দখল কৰে।
ইয়াৰ পিছত, ধনঞ্জয়াই শ্ৰীলংকাৰ ইনিংছ আৰম্ভ কৰে আৰু ৪২ টা বলত নট আউট ৬৬ ৰানৰ আকৰ্ষণীয় ইনিংছ খেলে। ইয়াৰ সৈতে, শ্ৰীলংকাই ১৮.৩ অভাৰত চাৰিটা উইকেটৰ বিনিময়ত ১৪৮ ৰান সংগ্ৰহ কৰি সহজ জয় পঞ্জীয়ন কৰে। তুলনামূলকভাৱে সৰু লক্ষ্য পিছ কৰি শ্ৰীলংকাই ভাল আৰম্ভণি কৰা নাছিল। মুজিব উৰ ৰহমানে (২/২৪) পাথুম নিচানকাক (১০) সোনকালেই পেভিলিয়নত উভতাই। ফজলহাক ফাৰুকীয়ে (১/২২) পৰৱৰ্তী অভাৰত মেডেন কৰি খেলখন আফগানিস্তানৰ বাবে কঠিন কৰি তোলে। অৱশ্যে, কুশল মেণ্ডিছে (২৫) পৰৱৰ্তী অভাৰত একেৰাহে দুটা বাউণ্ডেৰী মাৰে আৰু শ্ৰীলংকাই পাৱাৰপ্লেত এটা উইকেটত ২৮ ৰান সংগ্ৰহ কৰে। ৰছিদ খানে (২/৩১) মেণ্ডিছক তেওঁৰ প্ৰথম অভাৰত আউট কৰে। তাৰকা স্পিনাৰৰ পৰৱৰ্তী অভাৰত অৱশ্যে ১৪ ৰান সংগ্ৰহ কৰে, যাৰ ভিতৰত আছে ধনঞ্জয়াৰ এটা চাৰি আৰু এটা ছয়। ধনঞ্জয়াই চাৰিথ আসলংকাৰ (১৯) সৈতে ৫৪ ৰানৰ অংশীদাৰীত্ব আৰু ভানুকা ৰাজপাক্ষেৰ (১৮) সৈতে ৪২ ৰানৰ অংশীদাৰীত্ব কৰি শ্ৰীলংকাক জয়ৰ দিশলৈ আগুৱাই লৈ যায়।
