দিল্লীৰ আলিপুৰ অঞ্চলত ৰাখী বন্ধনৰ দিনা পঞ্জাৱত ভাতৃক লগ কৰিবলৈ গৈ থকা এগৰাকী ২০ বছৰীয়া যুৱতীয়ে বাছৰ খিৰিকীৰ পৰা বমি কৰিবলৈ চেষ্টা কৰি থকা অৱস্থাত সন্মুখৰ পৰা অহা এখন বাহনে তেওঁৰ মূৰটো চেপি ধৰাত মৃত্যু হোৱা বুলি আৰক্ষীয়ে জানিবলৈ দিয়ে। আৰক্ষীয়ে জনোৱা মতে, উত্তৰ প্ৰদেশৰ প্ৰতাপগড় জিলাত ঘৰ নিহত বাবলী নামৰ যুৱতীগৰাকীৰ।
বুধবাৰে আৰক্ষীয়ে নৰেলাৰ সত্যবাদী ৰাজা হৰিশ চন্দ্ৰ হাস্পতাল (এছ আৰ এইচ চি) চিকিৎসালয়ৰ পৰা এই তথ্য লাভ কৰে য’ত আহত অৱস্থাত লৈ যোৱা হৈছিল। আৰক্ষী উপ আয়ুক্ত (বাহিৰ উত্তৰ) ৰবি কুমাৰ সিঙে জনোৱা মতে, আৰক্ষীয়ে চিকিৎসালয়ত উপস্থিত হোৱাৰ সময়লৈকে ২০ বছৰীয়া যুৱতীগৰাকীক মৃত বুলি ঘোষণা কৰা হয়।
তদন্তৰ সময়ত জানিব পৰা গৈছে যে বাবলীয়ে প্ৰতাপগড়ৰ পৰা পঞ্জাৱৰ লুধিয়ানাত ভাতৃক লগ কৰিবলৈ আহিছিল। কাশ্মীৰ গেট আই এছ বি টিৰ পৰা হাৰিয়ানা ৰোডৱেজৰ বাছ এখনত গৈ থকা সময়ত তেওঁৰ লগত আছিল ভগ্নী পুনম আৰু ভায়েক ভনীজোঁৱাই আৰু তেওঁলোকৰ তিনি সন্তান।
আৰক্ষীৰ মতে, আলিপুৰ অঞ্চলৰ সমীপত মৃত যুৱতীগৰাকীয়ে অসুস্থ অনুভৱ কৰি বাছৰ খিৰিকীৰ পৰা মূৰটো উলিয়াই বমি কৰিবলৈ চেষ্টা কৰাৰ সময়তে সন্মুখৰ পৰা অহা এখন বাহনে তেওঁৰ মূৰত খুন্দা মাৰে।
আৰক্ষীয়ে জনোৱা মতে, “এই বিষয়ত আইনী ব্যৱস্থা গ্ৰহণ কৰা হৈছে। অপৰাধী বাহনখন আৰু ইয়াৰ চালকক চিনাক্ত কৰিবলৈ চিচিটিভিৰ ফুটেজো পৰীক্ষা কৰা হৈছে।” বিষয়টোৰ অধিক সবিশেষ জানিবলৈ অপেক্ষা কৰা হৈছে।
