লখিমপুৰত জঘন্য কাণ্ড। যৌতুকৰ বাবেই এগৰাকী মহিলাক গছত বান্ধি তালিবানী শাস্তি দিয়াৰ অভিযোগ।
জানিব পৰা মতে যৌতুকৰ বাবেই চিলাপথাৰৰ এগৰাকী যুৱতীক তেওঁৰ স্বামী গৃহত অকথ্য নিৰ্যাতন চলোৱাৰ এক গুৰুতৰ অভিযোগ উত্থাপন হৈছে।
চিলাপথাৰৰ চিলাগাঁৱৰ যুৱতী গৰাকীয়ে ২০২০ চনত লখিমপুৰৰ চাউলধোৱা আৰক্ষী চকীৰ অন্তৰ্গত কাঠৰী চাপৰিলৈ বিয়া হৈছিল। কিন্তু বিয়াৰ কিছুদিনৰ পিছৰে পৰাই মহিলাগৰাকীক স্বামীৰ পৰিয়ালে যৌতুকৰ বাবে অকথ্য নিৰ্যাতন চলাই আহিছিল।
যুৱতী গৰাকীৰ পিতৃয়ে যৌতুক দিব নোৱাৰাৰ বাবেই যুৱতী গৰাকীক মানসিক আৰু শাৰীৰিক নিৰ্যাতন চলাই আহিছে স্বামী পৰিয়ালে। ২০২০ত ধেমাজি আদালতত মহিলাগৰাকীয়ে গোচৰ তৰিছিল যদিও স্বামীৰ পৰিয়ালে কৌশলেৰে গোচৰ উঠাই ল’বলৈ বাধ্য কৰাইছিল।
যুৱতী গৰাকীক গছত বান্ধি লৈ অমানুষিক অত্যাচাৰ চলাইছিল। যোৱা ৩ বছৰে মহিলাগৰাকীক স্বামীৰ পৰিয়ালে নিৰ্যাতন চলোৱাৰ অভিযোগ উত্থাপন হৈছে। পিছত কোনো লোকে আৰক্ষীক খবৰ দিয়াত চাউলধোৱা আৰক্ষীয়ে বান্ধি থোৱা অৱস্থাত মহিলাগৰাকীক উদ্ধাৰ কৰে।
