উত্তৰ কাশ্মীৰৰ সীমান্তৱৰ্তী অঞ্চলত সেনা জোৱানে সন্ত্ৰাসবাদীৰ অনুপ্ৰৱেশৰ চেষ্টা বিফল কৰি দুজন সন্ত্ৰাসবাদীক হত্যা কৰে। এই তথ্য ভাগ-বতৰা কৰি জম্মু-কাশ্মীৰ আৰক্ষীয়ে কয় যে কুপৱাৰা আৰক্ষীয়ে দিয়া এক নিৰ্দিষ্ট তথ্যৰ ভিত্তিত মাছাল খণ্ডত এক এনকাউণ্টাৰ আৰম্ভ হয়, য’ত এতিয়ালৈকে দুজন সন্ত্ৰাসবাদী নিহত হৈছে। অপাৰেচন চলি আছে।
আৰক্ষীয়ে জনোৱা মতে, আন সন্ত্ৰাসবাদীৰ বিৰুদ্ধে তালাচী অভিযান অব্যাহত ৰখা হৈছে। আৰক্ষী বিষয়াৰ মতে, চোৰাংচোৱা ব্যৱস্থাই ইতিমধ্যে জানিব পাৰিছিল যে কুপৱাৰাৰ নিয়ন্ত্ৰণ ৰেখাত এদল সন্ত্ৰাসবাদীয়ে অনুপ্ৰৱেশ কৰাৰ পৰিকল্পনা কৰিছে। এই তথ্যৰ ভিত্তিত নিৰীক্ষণ ৰখা হৈছিল। যোৱা এসপ্তাহত জম্মু-কাশ্মীৰৰ ভিতৰত সন্ত্ৰাসবাদীৰ অনুপ্ৰৱেশৰ দ্বিতীয়টো ঘটনা। ইয়াৰ পূৰ্বে দেওবাৰে সেনাই উৰি ছেক্টৰত সন্ত্ৰাসবাদীৰ অনুপ্ৰৱেশ বিফল কৰি দুজন সন্ত্ৰাসবাদীক হত্যা কৰিছিল।
জম্মু-কাশ্মীৰত শীতকাল সোনকালে আহে। এনে সময়ত অনুপ্ৰৱেশৰ চেষ্টাৰ সম্ভাৱনা বাঢ়ি যায়। কাৰণ তুষাৰপাতৰ বাবে মাউণ্টেন পাছ বন্ধ হোৱাৰ আগতেই সন্ত্ৰাসবাদীয়ে উপত্যকাত প্ৰৱেশ কৰিব বিচাৰে। ইয়াৰ পূৰ্বে বুধবাৰে (২৫ অক্টোবৰ) নিৰাপত্তাৰক্ষীৰ এক বৈঠক অনুষ্ঠিত হয় য’ত সন্ত্ৰাসবাদীৰ অনুপ্ৰৱেশ বন্ধ কৰাৰ বিষয়টো আলোচনা কৰা হয়।
বৈঠকৰ সৈতে জড়িত বিষয়াসকলে জনোৱা মতে, চলি থকা ইজৰাইল-হামাছ যুদ্ধ সন্দৰ্ভত জম্মু-কাশ্মীৰত নিৰাপত্তা আৰু কৌশল প্ৰণয়ন কৰাৰ সিদ্ধান্ত লৈছে সকলো নিৰাপত্তা সংস্থাই। জম্মু-কাশ্মীৰ আৰক্ষী, চি আৰ পি এফ, সেনা আৰু চোৰাংচোৱা সংস্থাকে ধৰি বিভিন্ন নিৰাপত্তা সংস্থাৰ বিষয়াসকলে যিকোনো ঘটনাৰ মোকাবিলা কৰাৰ কৌশল ব্যাখ্যা কৰে।
জম্মু-কাশ্মীৰত সন্ত্ৰাসবাদ সন্দৰ্ভত সতৰ্ক হৈ আছে নিৰাপত্তা সংস্থা। শেহতীয়াকৈ জম্মু-কাশ্মীৰৰ আৰক্ষী সঞ্চালক প্ৰধান দিলবাগ সিঙে কৈছিল যে ২০২৩ চনত মাত্ৰ ১০ জন স্থানীয় যুৱকেহে সন্ত্ৰাসবাদৰ পথ বাছি লৈছিল। লগতে সন্ত্ৰাসবাদীক হিংসা ত্যাগ কৰি মূলসুঁতিলৈ ঘূৰি আহিবলৈ আহ্বান জনায়।
