বৰ্হিৰাজ্যত যানবাহন পঞ্জীয়ন কৰি সেই ৰাজ্যৰ নাম্বাৰ প্লেট লগাই অসমত যান-বাহন কৰ ফাঁকিৰে ব্যৱসায়-বাণিজ্য চলাই থকা বাহনৰ বিৰুদ্ধে সৰব হৈছে পৰিবহণ বিভাগ। ৰাজ্যৰ সহকাৰী পৰিবহণ আয়ুক্ত তথা অতিৰিক্ত দায়িত্ববাহী কামৰূপ মহানগৰ জিলা পৰিবহণ বিষয়া গৌতম দাসে কয় যে বিভিন্ন উদ্যোগ-প্ৰতিষ্ঠানে নিজৰ ব্যৱসায়িক স্বাৰ্থত বৰ্হিৰাজ্যত যান-বাহন পঞ্জীয়ন কৰি অসমত পূৰ্ণোদ্যমে আৰু নিগাজীকৈ ব্যৱসায় চলাই থাকিও যানবাহনৰ কৰ-কাটল আদায় নিদিয়াটো অত্যন্ত দুৰ্ভাগ্যজনক। অসম যিহেতু উত্তৰ পূৰ্বাঞ্চলৰ দুৱাৰমুখ সেয়ে নাগালেণ্ড, মণিপুৰ, মেঘালয়, মিজোৰামকে ধৰি চুবুৰীয়া অনান্য ৰাজ্যৰ উদ্যোগ-প্ৰতিষ্ঠানে ইয়াত ব্যৱসায় চলোৱাটো সাধাৰণ কথা। কিন্তু ব্যৱসায় নিগাজি হোৱাৰ লগে লগে প্ৰতিষ্ঠানসমূহে ব্যৱহাৰ্য বাহনসমূহ অসমৰ জিলা পৰিবহণ বিষয়াৰ কাৰ্যালয়, বিশেষকৈ সৰ্বাধিক সংখ্যকে যিহেতু গুৱাহাটীতে ব্যৱসায় চলাই আছে সেয়ে তেওঁলোকে কামৰূপ মহানগৰ জিলা পৰিবহণ বিষয়াৰ কাৰ্যালয়ত পঞ্জীয়ন কৰি যাৱতীয় কৰকাটল দিব লাগিব ৷ অসমৰ ৰাজপথত চলা প্ৰতিখন বাহনকে প্ৰতিনিয়ত সুৰক্ষা দিবলৈ ইয়াৰ পৰিবহণ বিষয়াৰ কাৰ্যালয়সমূহে যিহেতু সদাসচেতন ভূমিকা গ্ৰহণ কৰি আহিছে সেয়ে অসমৰ যানবাহন সুৰক্ষা আইনৰ আওটালৈ আহিবলৈ সকলো যানবাহন ব্যৱহাৰকাৰী দায়বদ্ধ হ’ব লাগিব । কিন্তু বিগত সময়ত এইকথা বাৰম্বাৰ অবগত কৰাৰ পিছতো বহুতেই বছৰ বছৰ ধৰি অসমত চূড়ান্ত কৰফাকিৰে চলাই আছে ব্যৱসায়িক বাহন। এইবাৰ এনেবোৰ অবৈধ বাহনক কোনো কাৰণতে অন্যায়-অনিয়মৰ প্ৰশয় লবলৈ দিয়া নহব। সেয়ে বছৰ বছৰ ধৰি অসমৰ বায়ু, পানী, বতাহ সেৱন কৰি ৰমৰমীয়া ব্যৱসায় চলাই থকা বৰ্হিৰাজ্যৰ বাহনসমূহ শীঘ্ৰে অসম তথা গুৱাহাটী মহানগৰীত পঞ্জীয়ন কৰি কৰকাটল আদায় দিবলৈ সহকাৰী পৰিবহণ আয়ুক্ত গৰাকীয়ে আহ্বান জনায়। অনতিপলমে এইসমূহ বাহনে কৰকাটল আদায় নিদিলে যানবাহন আইনৰ অধীনত বিভিন্ন ব্যবস্থা গ্ৰহণ কৰি বাহনসমূহ ব্লেকলিষ্টেড কৰি থিতাতে জব্দ কৰা হ’ব বুলিও কয় সহকাৰী পৰিবহণ আয়ুক্ত গৰাকীয়ে । ইফালে এতিয়াও যিসকলে যান-বাহনৰ নথি-পত্ৰ সঠিক কৰি ৰখা নাই আৰু বকেয়াসহ যাৱতীয় কৰ পৰিশোধ কৰা নাই তেওঁলোকক সুৰক্ষিত যাতায়াতৰ স্বাৰ্থত শীঘ্ৰেই কৰ পৰিশোধ কৰি বাহনসমূহ বৈধ কৰি ৰাখিবলৈ আহ্বান জনোবা হয়।
