বৃক্কৰ ৰোগত আক্ৰান্ত হৈ চৰকাৰী হাস্পতালত চিকিৎসাধীন হৈ থকা এগৰাকী ৯ বছৰীয়া কিশোৰীক ভুলবশতঃ পানীৰ সলনি স্পিৰিট খুওৱাৰ ফলত মৃত্যু ঘটাৰ অভিযোগ উত্থাপন হৈছে। কিশোৰীগৰাকীৰ পৰিয়ালে হাস্পতাল কৰ্তৃপক্ষৰ বিৰুদ্ধে এনে অভিযোগ উত্থাপন কৰাৰ পিছতে সৃষ্টি হৈছে তীব্ৰ প্ৰতিক্ৰিয়াৰ। অৱশ্যে হাস্পতাল কৰ্তৃপক্ষই পৰিয়ালৰ অভিযোগ খণ্ডন কৰিছে।
তামিলনাডুৰ মাদুৰাইৰ এখন চৰকাৰী চিকিৎসালয়ত সংঘটিত হৈছে এই ঘটনা। চিকিৎসালয়ৰ চিকিৎসকে দাবী কৰা মতে, মগজুৰ পৰা তেজ ওলোৱাৰ বাবেই ছোৱালীজনীৰ মৃত্যু হৈছিল। চৰকাৰী চিকিৎসালয়ৰ গাফিলতিৰ অভিযোগে ৰাজ্যত চাঞ্চল্যৰ সৃষ্টি কৰিছে।
ছোৱালীজনীৰ মাতৃয়ে দাবী কৰে যে চিকিৎসালয়ৰ নাৰ্ছসকলে স্পিৰিটটো তাইৰ বিচনাৰ কাষত এৰি থৈ গৈছিল। যেতিয়া ছোৱালীজনীয়ে পানী বিচাৰিছিল, তেতিয়া তেওঁ তাইক স্পিৰিট দিছিল। ইয়াৰ পিছত ছোৱালীজনীৰ স্বাস্থ্যৰ দ্ৰুত অৱনতি ঘটে। কিছু সময়ৰ পাছত তেওঁৰো মৃত্যু হ’ল। অৱশ্যে নাৰ্চৰ গাফিলতিৰ অভিযোগ অস্বীকাৰ কৰিছে চিকিৎসালয় কৰ্তৃপক্ষই। আনকি ড্ৰিংকিং স্পিৰিটৰ বাবে ছোৱালীজনীৰ মৃত্যু একেবাৰেই হোৱা নাছিল বুলিও দাবী কৰে। বৰঞ্চ মগজুৰ ৰক্তক্ষৰণৰ ফলত ৰোগীজনৰ মৃত্যু হয়।
মাদুৰাই চৰকাৰী চিকিৎসালয় কৰ্তৃপক্ষই দাবী কৰিছে যে মৰণোত্তৰ পৰীক্ষাৰ প্ৰতিবেদনত স্পিৰিট পানৰ ফলত হোৱা মৃত্যুৰ কথা উল্লেখ কৰা হোৱা নাই। মগজুত ৰক্তক্ষৰণৰ ফলত মৃত্যুৰ কাৰণ বুলি কোৱা হয়। চিকিৎসালয়ৰ এগৰাকী চিকিৎসকে দাবী কৰা মতে, মৃতকৰ মুখত সামান্য পৰিমাণৰ স্পিৰিট পোৱা গৈছে। কাৰণ তাৰ বেছিভাগ খাই বমি কৰিছিল। অৱশ্যে চিকিৎসালয়ৰ যুক্তি মানি ল’বলৈ অস্বীকাৰ কৰে মৃতকৰ পৰিয়ালে। মুঠতে এই ঘটনাত চাঞ্চল্যৰ সৃষ্টি হৈছে।
