কাছাৰ জিলাত পাষাণ পিতৃৰ হাততে প্ৰাণ গ’ল এটি ৬ বছৰীয়া কণমানিৰ। জিলাখনৰ লাঠিগ্ৰাম গাঁৱত এটি ৬ বছৰীয়া কন্যা শিশুক হত্যাৰ অভিযোগত সোমবাৰে পিতৃক গ্ৰেপ্তাৰ কৰাৰ পিছতে সমগ্ৰ অঞ্চলটোত বিৰাজ কৰে প্ৰতিক্ৰিয়াই। এজন জ্যেষ্ঠ আৰক্ষী বিষয়াই জানিবলৈ দিয়া মতে, এই ভয়ংকৰ ঘটনা সংঘটিত হোৱাৰ পিছতে অভিযুক্ত পিতৃ নাজিৰ উদ্দিন লস্কৰক গ্ৰেপ্তাৰ কৰা হৈছে। অভিযুক্তৰ পত্নী ফৰিদা বেগমে দাখিল কৰা এজাহাৰ অনুসৰি তেওঁলোকৰ বিয়াৰ পিছতে ধাৰাবাহিকভাৱে পত্নীৰ ওপৰত শাৰীৰিক আৰু মানসিক নিৰ্যাতন চলাই আহিছিল নাজিৰ উদ্দিনে।
পত্নী ফৰিয়াই কয়, ‘বৃহস্পতিবাৰে সন্ধিয়া (২১ ছেপ্টেম্বৰ) মাৰ ঘৰলৈ যাবলগীয়া হোৱাৰ বাবে তেওঁ মোক নিৰ্দয়ভাৱে প্ৰহাৰ কৰিছিল। পিছদিনা শুনিলোঁ মোৰ ছবছৰীয়া ছোৱালী আয়েশাক বিক্ৰী কৰি দিছে। মই তেওঁৰ ঘৰলৈ গৈ মোৰ ছোৱালীজনীৰ অৱস্থা সুধিলোঁ যদিও তেওঁ একো কোৱা নাছিল।’
এই বিষয়ত স্বামীৰ ভূমিকাৰ অভিযোগ উত্থাপন কৰি ফৰিদাই থানাত নিৰুদ্দেশৰ গোচৰ ৰুজু কৰে। ইয়াৰ পিছতে ২৩ ছেপ্টেম্বৰত আৰক্ষীয়ে লস্কৰক গ্ৰেপ্তাৰ কৰে। ইফালে দেওবাৰে সন্ধিয়া স্থানীয় লোকে উধৰবন্দ অঞ্চলত এটা নলাৰ সমীপত এটি শিশুৰ মৃতদেহ উদ্ধাৰ কৰে।
আৰক্ষীক খবৰ দিয়াত মৃতদেহটো আয়েশাৰ বুলি চিনাক্ত কৰা হয়। মৃতদেহটো মৰণোত্তৰ পৰীক্ষাৰ বাবে শিলচৰ চিকিৎসা মহাবিদ্যালয় আৰু চিকিৎসালয়লৈ প্ৰেৰণ কৰে। ফৰিদা বেগমে অভিযুক্তক মৃত্যুদণ্ডৰ শাস্তি প্ৰদানৰ দাবী জনাইছে।
