ভাৰতীয় ৰিজাৰ্ভ বেংকে শুকুৰবাৰে কয় যে নিষিদ্ধ কৰা ২,০০০ টকাৰ নোটৰ ৯৭.২৬ শতাংশ বেংকিং ব্যৱস্থালৈ ঘূৰি আহিছে, আনহাতে ৯,৭৬০ কোটি টকাৰ এনে নোট এতিয়াও দেশবাসীৰ হাতত মজুত আছে। ভাৰতীয় ৰিজাৰ্ভ বেংকে (আৰবিআই) ১৯ মে’ত প্ৰচলনৰ পৰা ২,০০০ টকাৰ বেংক নোট প্ৰত্যাহাৰ কৰাৰ কথা ঘোষণা কৰিছিল। ৰিজাৰ্ভ বেংকে এক বিবৃতিত কয়, “২০২৩ চনৰ ১৯ মে’ত ব্যৱসায়ৰ সমাপ্তিত প্ৰচলিত মুঠ ২,০০০ টকাৰ নোটৰ মূল্য আছিল ৩.৫৬ লাখ কোটি টকা। ২০২৩ ৰ ৩০ নৱেম্বৰত, ই ৯,৭৬০ কোটি টকালৈ হ্ৰাস পাইছিল।’ ভাৰতীয় ৰিজাৰ্ভ বেঙ্কৰ মতে, ১৯ মে’, ২০২৩ তাৰিখলৈকে, প্ৰচলিত মুঠ ২,০০০ টকাৰ নোটৰ ৯৭.২৬ শতাংশতকৈও অধিক এতিয়া বেংকলৈ উভতি আহিছে। লগতে কয় যে ২,০০০ টকাৰ বেংক নোট আইনী বৈধ হৈ থাকিব। দেশবাসীয়ে সমগ্ৰ দেশত আৰবিআইৰ ১৯ টা কাৰ্যালয়ত ২,০০০ টকাৰ বেংক নোট জমা বা বিনিময় কৰিব পাৰে। তেওঁলোকৰ ২,০০০ টকাৰ নোট পোনপটীয়াকৈ তেওঁলোকৰ বেংক একাউণ্টত জমা কৰিব পাৰে আৰু বীমাকৃত পদৰ জৰিয়তে ৰিজাৰ্ভ বেংকৰ নিৰ্ধাৰিত আঞ্চলিক কাৰ্যালয়লৈ প্ৰেৰণ কৰিব পাৰে। এই নোটবোৰ সলনি কৰা বা বেংক একাউণ্টত জমা দিয়াৰ সময়সীমা ৩০ ছেপ্টেম্বৰৰ আগতে আছিল। সময়সীমা পিছত ৭ অক্টোবৰলৈ বৃদ্ধি কৰা হৈছিল। বেংকৰ শাখাত জমা আৰু বিনিময় সেৱা দুয়োটা ৭ অক্টোবৰত বন্ধ কৰা হৈছিল।
৮ অক্টোবৰৰ পৰা, লোকসকলক তেওঁলোকৰ ১৯ টা কাৰ্যালয়ত নোট সলনি কৰিবলৈ বা তেওঁলোকৰ বেংক একাউণ্টত সমতুল্য পৰিমাণ জমা কৰাৰ বিকল্প দিয়া হৈছিল। ইফালে, আৰবিআইৰ কাৰ্যালয়সমূহত ২,০০০ টকাৰ নোট সলনি/জমা কৰাৰ বাবে গ্ৰাহকৰ দীঘলীয়া শাৰী দেখা গৈছে। আৰবিআইৰ ১৯টা কাৰ্যালয় আহমেদাবাদ, বেংগালুৰু, বেলাপুৰ, ভূপাল, ভূৱনেশ্বৰ, চণ্ডিগড়, চেন্নাই, গুৱাহাটী, হায়দৰাবাদ, জয়পুৰ, জম্মু, কানপুৰ, কলকাতা, লক্ষ্ণৌ, মুম্বাই, নাগপুৰ, নতুন দিল্লী, পাটনা আৰু তিৰুৱন্তপুৰমত অৱস্থিত।
