টি-২০ বিশ্বকাপৰ বাবে অভিলেখ ৯৩ কোটি টকাৰ পুৰস্কাৰ ঘোষণা আইচিচিৰ

আন্তৰ্জাতিক ক্ৰিকেট পৰিষদে (আইচিচি) টি-২০ বিশ্বকাপৰ বাবে অভিলেখ ১১.২৫ নিযুত ডলাৰ (প্ৰায় ৯৩ কোটি ৫১ লাখ টকা) ৰ পুৰস্কাৰৰ ধন ঘোষণা কৰিছে। যাৰ ভিতৰত বিজয়ীয়ে লাভ কৰিব ২.৪৫ নিযুত ডলাৰ (প্ৰায় ২০ কোটি ৩৬ লাখ টকা)। ৰানাৰ্ছ-আপে লাভ কৰিব ১.২৮ নিযুত ডলাৰ। আনহাতে ছেমি ফাইনেলিষ্টসকলে লাভ কৰিব ৭৮৭৫০০ ডলাৰ। যোৱাবাৰ মুঠ পুৰষ্কাৰৰ ধন আছিল ৫.৬ নিযুত ডলাৰ আৰু বিজেতা ইংলেণ্ডে লাভ কৰিছিল ১.৬নিযুত ডলাৰ।আইচিচিয়ে এক বিবৃতিত কয়-আইচিচি পুৰুষৰ টি-২০ বিশ্বকাপৰ নৱম সংস্কৰণৰ ২০ দলৰ প্ৰতিযোগিতাখনৰ বিজেতাই লাভ কৰিব ২.৪৫ নিযুত ডলাৰ প্ৰদান কৰা হ’ব, যিটো প্ৰতিযোগিতাখনৰ ইতিহাসৰ সৰ্বাধিক পুৰস্কাৰৰ ধন। ২৯ জুনত বাৰ্বাডোছত ফাইনেলৰ পিছত ট্ৰফী প্ৰদান কৰা হ’ব। চুপাৰ ৮ অতিক্ৰম কৰিবলৈ ব্যৰ্থ হোৱা চাৰিটা দলে প্ৰতিটোৱে ৩,৮২,৫০০ ডলাৰ লাভ কৰিব। আনহাতে ৯ম-১২তম স্থানৰ দলবোৰে ২,৪৭,৫০০ ডলাৰ আৰু ১৩-২০ তম স্থানৰ দলবোৰে প্ৰতিটোৱে ২,২৫,০০০ ডলাৰ লাভ কৰিব। ৫৫ খন খেলৰ প্ৰতিযোগিতাখন আমেৰিকা যুক্তৰাষ্ট্ৰ আৰু ৱেষ্ট ইণ্ডিজৰ নটা স্থানত ২৮ দিনতকৈও অধিক সময় ধৰি খেলা হ’ব। প্ৰথমবাৰৰ বাবে, ২০ টা দলে অংশগ্ৰহণ কৰিছে। প্ৰথম ৰাউণ্ডৰ ৪০ খন খেলৰ পিছত, শীৰ্ষ আঠটা দলে চুপাৰ ৮ ত উপনীত হ’ব। তাৰে চাৰিটা দলে ছেমি ফাইনেলত খেলিব।