মহাবলীপুৰমৰ উপকূলীয় মন্দিৰ(ক’ষ্ট টেম্পল)ত আন্তঃৰাষ্ট্ৰীয় যোগ দিৱস উদযাপনৰ লগতে ভাৰতৰ জি-২০ বহনক্ষম বিত্তীয় কৰ্মগোট (এছ এফ ডব্লিউ জি)ৰ বৈঠকৰ সামৰণি পৰিছে। জি-২০ৰ প্ৰতিনিধি আৰু নেশ্যনেল ইনষ্টিটিউট অৱ সিদ্ধৰ সদস্যসকলে যোগাভ্যাসক পুনৰ সজীৱ কৰি যোগাভ্যাসত অংশগ্ৰহণ কৰে। বৈঠকৰ সমাপ্তিৰ পিছত প্ৰতিনিধিসকলে মহাবলিপুৰমৰ চহকী ঐতিহ্য প্ৰদৰ্শন কৰা এক সাংস্কৃতিক অনুষ্ঠানতো অংশগ্ৰহণ কৰে।
এই বৈঠকৰ অন্তিম দিনটোত বহনক্ষম উন্নয়নৰ বাবে চৌপাশৰ পৰিৱেশ তন্ত্ৰৰ ক্ষমতা নিৰ্মাণ, জলবায়ু পৰিৱৰ্তনৰ বাবে সম্পদ সংগ্ৰহ কৰা আৰু পাৰিপাৰ্শ্বিক সমস্যা সমাধানৰ ওপৰত গুৰুত্ব আৰোপ কৰা হৈছিল। জলবায়ু সম্পৰ্কীয় বিনিয়োগৰ প্ৰতিবন্ধকতাৰ বিষয়ে আলোচনা কৰি প্ৰতিনিধিসকলক আপডেট কৰা পৰামৰ্শ উপস্থাপন কৰা হৈছিল।
বৈঠকৰ সময়ত এখন কৰ্মশালাৰ আয়োজন কৰা হয়। এই কৰ্মশালাত অংশগ্ৰহণ কৰি কেন্দ্ৰীয় চৰকাৰৰ বিত্ত মন্ত্ৰণালয়ৰ উপদেষ্টা গীতু যোশীয়ে কয় যে “২০৩০ চনৰ জলবায়ুৰ লক্ষ্যত উপনীত হোৱাৰ কাৰ্য-কলাপৰ সৈতে জড়িত বিত্তীয় বিপদাশংকা, সুযোগ আৰু প্ৰভাৱসমূহ বুজা আৰু উপলব্ধি কৰাটো অপৰিহাৰ্য হৈ পৰিছে।” এই কৰ্মশালাৰ সময়ত বহনক্ষম উন্নয়নৰ লক্ষ্য (এছডিজি) প্ৰাপ্ত কৰিবলৈ জলবায়ু আৰু সামাজিক বিত্ত বা বিত্তীয় সাহায্য কেনেদৰে একত্ৰিত আৰু সংগঠিত কৰিব পাৰি তাৰ ওপৰত বিশেষভাৱে আলোচনা কৰা হয়।
