কেৰালাৰ কোল্লাম জিলাত নিষিদ্ধ সংগঠন পপুলাৰ ফ্ৰণ্ট অৱ ইণ্ডিয়া (পিএফআই)ই ভাৰতীয় সেনাৰ এজন জোৱানক বন্দী কৰি অৰণ্যৰ মাজত শাৰীৰিক নিৰ্যাতন চলোৱাৰ অভিযোগ উত্থাপন হোৱাৰ পিছতে সৃষ্টি হৈছে তীব্ৰ প্ৰতিক্ৰিয়াৰ। এই ঘটনা সংঘটিত হয় দেওবাৰে। জানিব পৰা মতে, ভাৰতীয় সেনাৰ জোৱানজনক অপহৰণ কৰি প্ৰায় ছয়জন লোকে হাবিলৈ লৈ যায় আৰু তেওঁক শাৰীৰিকভাৱে প্ৰহাৰ কৰি পিঠিত ৰঙেৰে পিএফআই লিখাৰ অভিযোগ উত্থাপন হৈছে।
খবৰ অনুসৰি এই গোচৰৰ সন্দৰ্ভত আৰক্ষীৰ এজাহাৰ ৰুজু কৰা হৈছে। ভাৰতীয় সেনাৰ জোৱানজনৰ নাম চাইনী কুমাৰ। আৰক্ষীক দিয়া এজাহাৰত সেনা জোৱানজনে কয় যে তেওঁক প্ৰায় ছয়জন লোকে অপহৰণ কৰিছিল। তাৰ পিছত তেওঁক কদক্কালৰ ঘৰৰ সমীপতে থকা এখন ৰবৰৰ বাগানৰ মাজলৈ লৈ যোৱা হয়। লগতে তেওঁক হাবিলৈ লৈ যোৱাৰ পিছত হাত বান্ধি দিয়াৰ অভিযোগ উত্থাপন কৰে। এই আক্ৰমণৰ আঁৰৰ কাৰণ এতিয়াও জানিব পৰা হোৱা নাই।
তাৰ পিছত তেওঁলোকে ৰং লৈ পিঠিত পিএফআই লিখিলে। পিঠিত সেউজীয়া ৰঙেৰে লিখা পিএফআইৰ সৈতে ভাৰতীয় সেনা জোৱানৰ এটা ভিডিঅ’ই ছ’চিয়েল মিডিয়াত ভাইৰেল হৈ পৰিছে। ভিডিঅ’টোত দেখা গৈছে যে ভাৰতীয় সেনা জোৱানৰ টি-চাৰ্ট পিছফালৰ পৰা ফাটি গৈছে আৰু পিঠিত সেউজীয়া ৰঙেৰে লিখা পিএফআই দেখা গৈছে। ছ’চিয়েল মিডিয়াত ভাইৰেল হৈ পৰিছে এই ভিডিঅ’।
এই সন্দৰ্ভত এজাহাৰ পঞ্জীয়ন কৰা হৈছে। অৱশ্যে এই সন্দৰ্ভত এতিয়ালৈকে কোনো লোকক গ্ৰেপ্তাৰ কৰা হোৱা নাই। ভাৰত চৰকাৰে পিএফআই নিষিদ্ধ কৰাৰ লগতে নিষিদ্ধ সংগঠনটোৰ বিৰুদ্ধে বলবৎকাৰী সঞ্চালকালয় আৰু ৰাষ্ট্ৰীয় অনুসন্ধান সংস্থাই বৃহৎ দমন চলাই থকাৰ সময়তে এই ঘটনা সংঘটিত হোৱাত তীব্ৰ প্ৰতিক্ৰিয়াৰ সৃষ্টি হৈছে।
