“আমাক আমাৰ প্ৰাপ্য দিয়ক। আমি অধিক সেৱা আগবঢ়াবলৈ সাজু, আমাৰ ঠিকাভিত্তিক চাকৰি নিয়মীয়া কৰক ”বিগত এটা দশকৰো অধিক কাল নিৰবিছিন্ন আৰু গুৰুত্বপূৰ্ণ চৰকাৰী সেৱা আগবঢ়াই অহা পঞ্চায়ত আৰু গ্ৰামোন্নয়ন বিভাগৰ ঠিকাভিত্তিক কৰ্মচাৰী সকলৰ সংঘবদ্ধ দাবী।
সদৌ অসম পঞ্চায়ত আৰু গ্ৰামোন্নয়ন ঠিকাভিত্তিক কৰ্মচাৰী পৰিষদৰ আহ্বান ক্ৰমে ঢকুৱাখনা মহকুমাৰ ঘিলামৰা আৰু ঢকুৱাখনা উন্নয়ন খণ্ডৰ ঠিকাভিত্তিক কৰ্মচাৰী সকলেও এই নাৰ্য প্ৰাপ্য বিচৰা গণতান্ত্ৰিক আন্দোলনত ব্ৰতী হৈ আহিছে।
মহকুমাটোৰ অৰ্ধ শতাধিক ঠিকাভিত্তিক গ্ৰামোন্নয়ন বিভাগৰ কৰ্মচাৰীয়ে মঙ্গলবাৰৰ পৰা বৃহস্পতিবাৰ পৰ্যন্ত তিনি দিন ধৰি অব্যাহত ৰখা জীৱন জীৱিকাৰ অধিকাৰ বিচৰা গণতান্ত্ৰিক প্ৰতিবাদী কাৰ্যসূচীৰ ফলত দুয়োটা উন্নয়নখণ্ডৰ স্বাভাৱিক কাম কাজত ব্যাপক বাধাগ্ৰস্ততা আহি পৰিছে । পঞ্চায়ত আৰু গ্ৰামোন্নয়ন বিভাগৰ বহু গুৰুত্বপূৰ্ণ দৈনিক সেৱা অব্যাহত ৰখাত আহি পৰিছে ব্যাপক প্ৰতিবন্ধকতা। কাৰ্যতঃ অচল হৈ আছে ঢকুৱাখনা মহকুমাৰ দুয়োটা উন্নয়ন খণ্ড বিগত ৩দিন ধৰি।
উল্লেখ্য যে যোৱা ১ ফেব্ৰুৱাৰীৰ পৰা আৰম্ভ হোৱা এই প্ৰতিবাদৰ ফলত ৰাজ্যখনৰ লগতে লখিমপুৰ জিলা পঞ্চায়ত আৰু গ্ৰামোন্নয়ন বিভাগৰ অন্তৰ্গত নাৰায়ণপুৰ , বিহপুৰীয়া ,নাওবৈছা , কৰুনাবাৰী ,লখিমপুৰ, টেলাহী, বগীনদী , ঘিলামৰা আৰু ঢকুৱাখনা উন্নয়নখণ্ড সহ মুঠ ৯ টা উন্নয়নখণ্ডত ব্যাপক অচলাবস্থাৰ সৃষ্টি কৰিছে । চাকৰিৰ কাৰ্যকাল ৬০ বছৰলৈ বৃদ্ধি , চৰকাৰী কৰ্মচাৰীয়ে ভোগ কৰা সকলো সা সুবিধা ঠিকাভিত্তিক কৰ্মচাৰী সকলকো প্ৰদান কৰা, বিভাগীয় খালি পদত যোগ্যতা অনুসৰি বাছনি পৰীক্ষা পাতি স্থায়ী নিযুক্তি প্ৰদান কৰা ,সম কামৰ সম বেতন নীতি প্ৰৱৰ্তন কৰা , আৰ অ পি অনুসৰি বেতন প্ৰদান কৰা আদি দাবীৰ সমৰ্থনত ৰাজ্য জুৰি অব্যাহত থকা এই সামূহিক প্ৰতিবাদৰ পাছতো ৰাজ্য চৰকাৰৰ পঞ্চায়ত আৰু গ্ৰামোন্নয়ন মন্ত্ৰী ৰঞ্জিত দাসৰ মৰ টোপনি ভগা নাই ।
স্পৰ্শকাতৰ পৰ্যায়লৈ বিষয়টো ঠেলি দি কুম্ভকৰ্ণ নিদ্ৰাত মত্ত হোৱা বেপেৰোৱা মন্ত্ৰী দাসৰ এনে গুৰুত্বহীন ভূমিকাৰ বাবেই নিজৰেই বিভাগটোৰ নিয়মীয়া সেৱা আগবঢ়োৱাত বাধা আহি পৰিছে । এগৰাকী বিভাগীয় মন্ত্ৰীৰ এনে দায়িত্বহীন আচৰণত ক্ষুব্ধ নিষ্ঠাবান কৰ্মচাৰীসকলে এই গুৰুত্বপূৰ্ণ বিষয়টোৰ সন্দৰ্ভত মুখ্যমন্ত্ৰী ডঃ হিমন্ত বিশ্ব শৰ্মাৰ জৰুৰী হস্তক্ষেপৰ দাবী জনাইছে ।
