অসম বিজেপি কিষাণ মৰ্চাৰ নেত্ৰী ইন্দ্ৰাণী তহবিলদাৰৰ কৰুণ মৃত্যুৰ পৰিপ্ৰেক্ষিতত মুখ্যমন্ত্ৰী হিমন্ত বিশ্ব শৰ্মাই নিৰপেক্ষ তদন্ত প্ৰক্ৰিয়া নিশ্চিত কৰিবলৈ মৌনতা অৱলম্বন কৰিবলৈ আহ্বান জনাইছে। সংবাদ মাধ্যমক সম্বোধন কৰি মুখ্যমন্ত্ৰীয়ে চলি থকা তদন্তত সম্ভাৱ্য প্ৰভাৱ পেলাব পৰা বক্তব্য বা মন্তব্য দিয়াৰ পৰা বিৰত থকাৰ আহ্বান জনায়।
ঘটনা সন্দৰ্ভত প্ৰথম প্ৰতিক্ৰিয়া প্ৰকাশ কৰি মুখ্যমন্ত্ৰী হিমন্ত বিশ্ব শৰ্মাই কয় যে তদন্তৰ স্বাৰ্থত মৌনতা বজাই ৰখাটোৱে সকলোকে সহায় কৰিব।
উল্লেখ্য যে, যোৱা ১১ আগষ্টত ভাৰতীয় জনতা পাৰ্টিৰ কিষাণ মৰ্চাৰ অসমৰ এগৰাকী বিশিষ্ট নেত্ৰী ইন্দ্ৰাণী তহবিলদাৰে গুৱাহাটীত আত্মহত্যা কৰিছিল। ইয়াৰ পিছতে তেওঁৰ এখন গোপন ফটো ভাইৰেল হৈ পৰাৰ পিছতে তীব্ৰ প্ৰতিক্ৰিয়াৰ সৃষ্টি হোৱাৰ লগতে নেত্ৰীগৰকাৰীৰ মৃত্যু ৰহস্যঘন হৈ পৰে।
ইন্দ্ৰাণী তহবিলদাৰৰ মৃত্যুক লৈ চলি থকা তদন্তত প্ৰধান সন্দেহযুক্ত হিচাপে প্ৰকাশ পাইছে বিজেপি কিষাণ মৰ্চাৰ সদস্য অনুৰাগ চলিহাৰ নাম। কিন্তু জেৰাৰ সময়ত চলিহাই নিৰ্দোষী বুলি দাবী কৰি তদন্তকাৰীক স্তম্ভিত কৰি আন এজন ব্যক্তি অভিমন্যু দাসলৈ আঙুলিয়াই দিয়ে।
অনুৰাগ চলিহাৰ ভাষ্যই এতিয়া অধিক ৰহস্যঘন কৰি তুলিছে সমগ্ৰ কাণ্ড। ইন্দ্ৰাণী তহবিলদাৰৰ আত্মহত্যাৰ সৈতে অভিমণ্যু দাস কিদৰে জড়িত তাৰ তদন্ত চলি আছে।
অসম আৰক্ষীয়ে গুৱাহাটী আৰক্ষী আৰু শিৱসাগৰ আৰক্ষীৰ যৌথ প্ৰচেষ্টাৰ লগতে ১৩ আগষ্টত ডিমৌত অনুৰাগ চলিহাক গ্ৰেপ্তাৰ কৰে। পৰৱৰ্তী সময়ত অনুৰাগ চলিহাক অধিক সোধা-পোছাৰ বাবে চান্দমাৰী থানালৈ লৈ যোৱা হয়। জেৰাৰ সময়ত চলিহাৰ অভিমন্যু দাসৰ বিৰুদ্ধে উত্থাপিত অভিযোগে তদন্তক এক নতুন দিশলৈ লৈ যায়।
