ইজৰাইলে গাজাত হামাছৰ বিৰুদ্ধে আৰম্ভ কৰা যুদ্ধত ২০,০০০ তকৈও অধিক পেলেস্তাইনী নিহত হৈছে। গাজাৰ স্বাস্থ্য বিভাগে এই কথা প্ৰকাশ কৰিছে। ইফালে, ইজৰাইলে গাজাত আক্ৰমণ বৃদ্ধি কৰিছে আৰু লাখ লাখ লোকক তেওঁলোকৰ ঘৰৰ পৰা সুৰক্ষিত স্থানলৈ পলাই যাবলৈ কোৱা হৈছে। গাজাত হোৱা মৃত্যুৰ সংখ্যা অঞ্চলটোৰ যুদ্ধপূৰ্ব জনসংখ্যাৰ প্ৰায় এক শতাংশ। যোৱা ১১ সপ্তাহ ধৰি ইজৰাইল আৰু হামাছৰ মাজত হোৱা যুদ্ধত নিহতৰ সংখ্যাই বিশ্বক চিন্তিত কৰি তুলিছে। ইজৰাইলৰ বায়ু আৰু স্থল আক্ৰমণ শেহতীয়া ইতিহাসৰ আটাইতকৈ ধ্বংসাত্মক সামৰিক অভিযানসমূহৰ ভিতৰত এটা, যাৰ ফলত গাজাৰ ২.৩ নিযুত জনসংখ্যাৰ ৮৫ শতাংশই সুৰক্ষিত স্থানত আশ্ৰয় ল’বলৈ বাধ্য হৈছে। ৰাষ্ট্ৰসংঘ আৰু অন্যান্য সংস্থাসমূহে বৃহস্পতিবাৰে প্ৰকাশ কৰা এক প্ৰতিবেদন অনুসৰি গাজাত আধা নিযুতৰো অধিক লোক অনাহাৰৰ সন্মুখীন হৈছে। ৭ অক্টোবৰত ইজৰাইলত হোৱা আক্ৰমণত হামাছে প্ৰায় ১২০০ লোকক হত্যা কৰে আৰু প্ৰায় ২৪০ জন লোকক অপহৰণ কৰে। ইজৰাইলে হামাছক ধ্বংস কৰা আৰু গাজাত ক্ষমতাৰ পৰা আঁতৰোৱা আৰু সকলো বন্দীক মুক্ত নকৰালৈকে যুঁজ অব্যাহত ৰখাৰ প্ৰতিশ্ৰুতি দিছে।
