ভাৰতীয় মহিলা দলৰ অধিনায়ক হৰমনপ্ৰীত কৌৰ আৰু উপ-অধিনায়ক স্মৃতি মান্ধানাই মঙলবাৰে প্ৰকাশিত আন্তঃৰাষ্ট্ৰীয় ক্ৰিকেট পৰিষদৰ (আইচিচি) শেহতীয়া এদিনীয়া ৰেংকিঙত এটাকৈ স্থান উন্নত কৰিছে। হৰমনপ্ৰীত বেটছমেনৰ ৰেংকিঙত ১৩ তম স্থানত আছে, আনহাতে মান্ধানা নৱম স্থানৰ সৈতে শীৰ্ষ ভাৰতীয় হৈছে।
তিনিখন এদিনীয়া শৃংখলাত হৰমনপ্ৰীতে ৫৯.৫০ গড়ে ১১৯ ৰান সংগ্ৰহ কৰে আৰু লগতে তিনিটা উইকেট দখল কৰি ভাৰতীয় দলটোক শৃংখলাটোত ৩-০ ৰ অগ্ৰগতি প্ৰদান কৰে। তেওঁক শৃংখলাটোৰ শ্ৰেষ্ঠ খেলুৱৈ হিচাপে বিবেচিত কৰা হৈছিল। মান্ধানাই এই শৃংখলাটোত ৫২ ৰ গড়ত ৰান কৰিছিল। তেওঁ এই সময়ছোৱাত এটা শতকও অৰ্জন কৰিছিল।
ৰেংকিং তালিকাত অগ্ৰসৰ হোৱা আন ভাৰতীয় বেটছমেনসকলৰ ভিতৰত আছে শফালী বাৰ্মা (তিনিটা স্থান আগুৱাই ৩৩ তম স্থান), যশীকা ভাটিয়া (এটা স্থান আগুৱাই ৪৫ তম স্থান) আৰু বলিং-অলৰাউণ্ডাৰ পূজা বস্ত্ৰকাৰ (আঠ স্থান আগুৱাই পৰা ৫৩ তম স্থান)। বলাৰসকলৰ ভিতৰত ৰাজেশ্বৰী গায়কৱাডে তিনিটা স্থান উন্নত কৰি যুটীয়াভাৱে নৱম স্থানত উপনীত হয়, আনহাতে মেঘনা সিঙে দুটা স্থান উন্নত কৰি ৪৩ তম স্থানত উপনীত হয় আৰু বস্ত্ৰকাৰে দুটা স্থান বৃদ্ধি কৰি যুটীয়াভাৱে ৪৮ তম স্থানত উপনীত হয়। এই ভ্ৰমণত দলত স্থান নোপোৱা অভিজ্ঞ ভাৰতীয় দ্ৰুত বলাৰ ঝুলন গোস্বামী বলাৰৰ তালিকাৰ ষষ্ঠ স্থানত আছে। অষ্ট্ৰেলিয়াৰ এলিছা হিলি আৰু ইংলেণ্ডৰ নাটালি চাইভাৰ বেটছমেনৰ তালিকাৰ শীৰ্ষ দুটা স্থানত আছে, আনহাতে ইংলেণ্ডৰ ছফি একলেষ্টোন আৰু দক্ষিণ আফ্ৰিকাৰ শ্বাবনিয়াম ইছমাইলে বলিং ৰেংকিঙত ক্ৰমান্বয়ে প্ৰথম আৰু দ্বিতীয় স্থানত আছে।
