স্কিল ইণ্ডিয়াই প্ৰাক্তন সৈনিক আৰু সেনা-বাহিনীৰ অৱসৰপ্ৰাপ্ত কৰ্মচাৰীসকলৰ নিয়োগযোগ্যতা বৃদ্ধিৰ বাবে পুনৰ সংস্থাপন প্ৰশিক্ষণ কাৰ্যসূচীৰ বাবে ভাৰতীয় সশস্ত্ৰ বাহিনীৰ সৈতে সহযোগিতা কৰিছে। এই পদক্ষেপে চাকৰিৰ পৰা অৱসৰ গ্ৰহণ কৰাৰ পিছত ৭০,০০০ সশস্ত্ৰ বাহিনীৰ জোৱানৰ লাভজনক পুনৰ সংস্থাপন নিশ্চিত কৰিব। ইয়াৰ বাবে দক্ষতা বিকাশ আৰু উদ্যমিতা মন্ত্ৰালয়ৰ অধীনত তেলেংগানাৰ আঞ্চলিক দক্ষতা বিকাশ আৰু উদ্যমিতা সঞ্চালকালয়ে (আৰডিএছডিই) প্ৰাক্তন সৈনিক কল্যাণ বিভাগ(প্ৰতিৰক্ষা মন্ত্ৰালয়)ৰ সাধাৰণ পুনৰ সংস্থাপন সঞ্চালকালয়(ডিজিআৰ)ৰ সৈতে অংশীদাৰিত্ব কৰিছে।
এই কাৰ্যসূচীৰ উদ্দেশ্য হৈছে মহাকাশ, বিমান, মূলধনী সামগ্ৰী আৰু স্বয়ংচালিত বা অটোমোটিভ সামগ্ৰীৰ দৰে খণ্ডত অৱসৰপ্ৰাপ্ত সেনা জোৱানসকলৰ নিয়োগযোগ্যতা বৃদ্ধি কৰা। এই কাৰ্যসূচীৰ জৰিয়তে অৱসৰপ্ৰাপ্ত কৰ্মীসকলক অসামৰিক জীৱনলৈ পুনৰ ৰূপান্তৰিত কৰাত সহায় কৰিব, বিশেষভাৱে সক্ষম সৈনিক, বিধৱা আৰু নিৰ্ভৰশীল লোককে ধৰি সশস্ত্ৰ সেৱাৰ কৰ্মীসকলৰ বৈচিত্ৰ্যপূৰ্ণ দক্ষতাৰ গোটক যোগান ধৰিব। সশস্ত্ৰ বাহিনীৰ ৭০,০০০ কৰ্মচাৰীৰ সফল পুনৰ্বাস নিশ্চিত কৰাৰ বাবে সমগ্ৰ ভাৰতৰ ৩৩খন ৰাষ্ট্ৰীয় দক্ষতা প্ৰশিক্ষণ প্ৰতিষ্ঠানত এই কাৰ্যসূচীসমূহ অনুষ্ঠিত কৰা হ’ব। এই পুনৰ সংস্থাপন প্ৰশিক্ষণ কাৰ্যসূচীয়ে এক বিস্তৃত পাঠ্যক্ৰম আগবঢ়ায়, যাৰ ভিতৰত আছে ৰাষ্ট্ৰীয় দক্ষতা প্ৰশিক্ষণ প্ৰতিষ্ঠান (এনএছটিআই) বিদ্যানগৰ আৰু এনএছটিআই ৰমান্থাপুৰত ৩টা বিশেষ পাঠ্যক্ৰম।
এই পদক্ষেপক প্ৰশংসা কৰি দক্ষতা বিকাশ আৰু উদ্যমিতা মন্ত্ৰালয়ৰ সচিব অতুল কুমাৰ তিৱাৰীয়ে কয় যে, “আমাৰ সশস্ত্ৰ সেৱাৰ কৰ্মী বা সেনা জোৱানক অসামৰিক জীৱনলৈ পৰিৱৰ্তনৰ লগে লগে সবলীকৰণৰ বাবে সমৰ্পিত পদক্ষেপসমূহৰ নেতৃত্ব প্ৰদান কৰি আমি অপৰিসীম গৌৰৱ অনুভৱ কৰিছোঁ।”
