কমনৱেলথ গেমছত দুবাৰকৈ স্বৰ্ণ পদক বিজয়ী সঞ্জীতা চানু আকৌ এবাৰ ড’প টেষ্টত বিফল হৈছে। সংবাদ মাধ্যমৰ বাতৰি অনুসৰি, ৰাষ্ট্ৰীয় এণ্টি-ড’পিং এজেন্সিয়ে (এনএডিএ) গুজৰাট নেচনেল গেমছ (২০২২)ত তেওঁৰ নমুনা লৈছিল, য’ত তেওঁ ড’প টেষ্টত বিফল হয়। ইয়াৰ পিছত, সঞ্জিতাৰ ওপৰত অস্থায়ী নিষেধাজ্ঞা আৰোপ কৰা হৈছে। এতিয়া সঞ্জিতাই এনএডিএ ৰ শুনানি পেনেলৰ আগত নিজৰ নিৰ্দোষতা প্ৰমাণ কৰিব লাগিব নহ’লে তেওঁক ৪ বছৰৰ বাবে নিষিদ্ধ কৰাৰ সম্ভাৱনা আছে। ২০১৪ চনৰ গ্লাছগো আৰু ২০১৮ চনৰ গোল্ড কোষ্ট কমনৱেলথ গেমছত সোণৰ পদক অৰ্জন কৰা সঞ্জিতাই ২০২২ৰ ৩০ ছেপ্টেম্বৰত আহমেদাবাদত অনুষ্ঠিত ৰাষ্ট্ৰীয় ক্ৰীড়াত ৪৯ কিলোগ্ৰাম ওজন শাখাত অংশগ্ৰহণ কৰিছিল। ইয়াত, মীৰাবাঈ চানুৱে ১৯১ কিলোগ্ৰাম ওজনৰ সৈতে স্বৰ্ণ জয় কৰে আৰু সঞ্জিতাই ১৮৭ কিলোগ্ৰাম ওজনৰ সৈতে ৰূপৰ পদক জিকিছিল। এই সময়ছোৱাত, এনএডিএ-য়ে তেওঁৰ নমুনা লৈছিল, য’ত ষ্টেৰইড পোৱা গৈছে। সংবাদ মাধ্যমৰ প্ৰতিবেদন অনুসৰি, সঞ্জিতাৰ বি নমুনাও কৰা হৈছে আৰু ইয়াৰ ফলাফল এ নমুনাৰ দৰে একে হৈছে। উল্লেখ্য যে সঞ্জীতা চানুৰ ওপৰত পূৰ্বে ২০১৮ চনৰ মে’ মাহত ড’পিং কৰাৰ অভিযোগ উত্থাপিত হৈছিল। অৱশ্যে, আন্তৰ্জাতিক ভাৰোত্তোলন ফেডাৰেশ্যনে (আইডব্লিউএফ) তেতিয়া তেওঁৰ ভুল স্বীকাৰ কৰে আৰু ২০২০ চনত তেওঁক অভিযোগৰ পৰা মুক্তি দিয়ে। ইয়াৰ ফলত সঞ্জীতাৰ কেৰিয়াৰত ২ বছৰৰ ক্ষতি হৈছিল। দৰাচলতে, আইডব্লিউএফে ২০১৭ চনত আমেৰিকা যুক্তৰাষ্ট্ৰত বিশ্ব চেম্পিয়নশ্বিপৰ সময়ত তেওঁৰ নমুনা লৈছিল। এইটো পৰীক্ষা কৰাৰ পিছত, কোৱা হৈছিল যে তেওঁৰ টেষ্টোষ্টেৰনৰ স্তৰ উচ্চ। অৱশ্যে, আইডব্লিউএফে পিছত স্বীকাৰ কৰিছিল যে ই নমুনা নম্বৰটো ভুল কৰিছিল আৰু সঞ্জিতাৰ সৈতে ইয়াৰ কোনো সম্পৰ্ক নাছিল। সঞ্জীতাৰ উপৰিও গুজৰাট ৰাষ্ট্ৰীয় ক্ৰীড়াত ৫৫ কিলোগ্ৰাম ওজনৰ শাখাত ৰূপৰ পদক অৰ্জন কৰা বীৰজিৎ কৌৰকো ড’প পজিটিভ বুলি জানিব পৰা গৈছে।
