তিনিচুকীয়া জিলাত প্ৰেমিকে প্ৰেয়সীক দাৰে ঘপিয়াই হত্যাৰ চেষ্টা চলোৱাৰ ঘটনাই তীব্ৰ চাঞ্চল্যৰ সৃষ্টি কৰিছে।
মাৰ্ঘেৰিটাত দেওবাৰে নিশা আকাশ দত্ত নামৰ অভিযুক্তই প্ৰেমিকাক হত্যাৰ অপচেষ্টা চলোৱাত যুৱতীগৰাকী গুৰুতৰভাৱে আহত হয়।
ততাতৈয়াকৈ আহত যুৱতীগৰাকীক ওচৰৰ চিকিৎসালয়লৈ লৈ যোৱা হয় আৰু পিছত উন্নত চিকিৎসাৰ বাবে অসম চিকিৎসা মহাবিদ্যালয় আৰু চিকিৎসালয়লৈ প্ৰেৰণ কৰা হয়।
সংবাদ মাধ্যমৰ সৈতে হোৱা কথা-বতৰাত আহত যুৱতীগৰাকীৰ পিতৃয়ে কয়, ‘নিশা প্ৰায় ১১ বজাত, যেতিয়া মই শুই আছিলো, তেতিয়া মোৰ পৰিয়ালৰ লোকে চিঞৰ-বাখৰ কৰা শুনিছিল। বেডৰুমৰ পৰা লৰালৰিকৈ ওলাই অহাৰ পিছত গম পালোঁ যে ল’ৰাটোৱে মোৰ ছোৱালীজনী বাথৰুমৰ পৰা ওলাই আহোঁতে দা ৰে আক্ৰমণ কৰে। এই অৱস্থাত থকা মোৰ ছোৱালীজনীক চোৱাৰ পিছত লগে লগে চিকিৎসালয়লৈ লৈ গ’লোঁ আৰু পিছত তেওঁলোকে তাইক এ এম চি এইচলৈ ৰেফাৰ কৰিলে। এতিয়াও তাইৰ অৱস্থা সংকটজনক।”
‘মই অভিযুক্তক ব্যক্তিগতভাৱে চিনি নাপাওঁ। তেওঁলোকৰ মাজত কোনো প্ৰেমৰ সম্পৰ্ক আছিল নেকি নাজানো কিন্তু শুনিছো যে তেওঁলোক উচ্চতৰ মাধ্যমিকৰ বাবে একেখন প্ৰতিষ্ঠানতে গৈছিল।’
পিতৃয়ে আৰু কয় যে কিছুদিন আগতে সেই একেজন ল’ৰাই নিজৰ ছোৱালীজনীৰ মোবাইল ফোন কাঢ়ি লৈ গৈছিল আৰু স্থানীয় লোকে তৎক্ষণাত ব্যৱস্থা গ্ৰহণ কৰি তেওঁক আটক কৰিছিল। পিছত আৰক্ষীৰ হাতত গতাই দিলে।
এই কথা পোহৰলৈ আহিছে যে অভিযুক্তজন ড্ৰাগছ আসক্ত আছিল।
অপৰাধ সংঘটিত কৰাৰ পিছৰে পৰা পলাতক হৈ আছে আকাশ।
