নিৰ্বাচনৰ সময়ত প্ৰদান কৰা ১ লাখ চৰকাৰী নিযুক্তিৰ প্ৰতিশ্ৰুতি প্ৰদান কৰি আগন্তুক দুমাহত পুনৰ ২২ হাজাৰ পদৰ চাকৰিৰ বিজ্ঞাপন প্ৰকাশৰ ঘোষণা কৰে মুখ্যমন্ত্ৰী হিমন্ত বিশ্ব শৰ্মাই।
এক অনুষ্ঠানৰ সময়ত শৰ্মাই ব্যক্তিগতভাৱে একাধিক চৰকাৰী বিভাগৰ তৃতীয় আৰু চতুৰ্থ শ্ৰেণীৰ খালী পদ পূৰণৰ লক্ষ্যৰে শেহতীয়াকৈ অনুষ্ঠিত হোৱা অসম প্ৰত্যক্ষ নিযুক্তি পৰীক্ষা (এডিআৰই)ৰ পৰা ৫১৪ গৰাকী সফল পৰীক্ষাৰ্থীক নিযুক্তি পত্ৰ প্ৰদান কৰে।
বৰ্তমানলৈকে তেওঁৰ কাৰ্যকালত ৰাজ্যত ৮৭,৪০২ গৰাকী প্ৰাৰ্থীক চৰকাৰী পদত নিযুক্তি প্ৰদান কৰা হৈছে বুলিও মন্তব্য কৰে ড০ শৰ্মাই।
দেওবাৰে তেওঁ কয় যে এমাহ বা দুমাহৰ ভিতৰত আৰু ২২ হাজাৰ খালী পদ পূৰণৰ বাবে নিযুক্তিৰ বিজ্ঞাপন প্ৰকাশ পাব।
মুখ্যমন্ত্ৰীগৰাকীয়ে কয় যে ৰাজ্যৰ মন্ত্ৰীসভাই ২০২১ চনত অনুষ্ঠিত হোৱা প্ৰাৰম্ভিক বৈঠকত অসমৰ নিবনুৱা যুৱক-যুৱতীক এই এক লাখ চাকৰি প্ৰদানৰ পৰিকল্পনা আনুষ্ঠানিকভাৱে অনুমোদন জনাইছিল। কিন্তু ক’ভিড-১৯ মহামাৰীৰ দ্বিতীয় আৰু তৃতীয় ঢৌৰ ফলত সৃষ্টি হোৱা ব্যাঘাতৰ বাবে সমগ্ৰ প্ৰক্ৰিয়াটোত পলম হয়।
