চৰকাৰী ভূমি দখল কৰি থকা অবৈধ বেদখলকাৰীৰ বিৰুদ্ধে অভিযান অব্যাহত ৰাখিব অসম চৰকাৰে। এই মন্তব্য কৰে মন্ত্ৰী পীযুষ হাজৰিকাই।
নগাঁৱত সংবাদ মাধ্যমৰ সৈতে হোৱা কথা-বতৰাত তেওঁ কয়, ‘অবৈধ বেদখলকাৰীৰ বিৰুদ্ধে আমি আমাৰ অভিযান অব্যাহত ৰাখিম। কোনোবাই যদি আইনৰ বিৰুদ্ধে যাব, আমি আইনৰ বিৰুদ্ধে একো হ’বলৈ নিদিওঁ।”
ইয়াৰ পূৰ্বে ৰূপহীহাট সমষ্টিৰ কংগ্ৰেছৰ বিধায়ক নুৰুল হুদাই বুঢ়াচাপৰি বন্যপ্ৰাণী অভয়াৰণ্য এলেকাত চলি থকা উচ্ছেদ অভিযান বন্ধ কৰাৰ চেষ্টা চলাইছিল।
১৪ ফেব্ৰুৱাৰীৰ পৰা শোণিতপুৰ আৰু নগাঁও জিলা প্ৰশাসনে বন্যপ্ৰাণী অভয়াৰণ্যখনৰ প্ৰায় ১৮৯২ হেক্টৰ মাটি “অবৈধভাৱে দখল” কৰা লোকসকলৰ বিৰুদ্ধে উচ্ছেদ অভিযান আৰম্ভ কৰিছিল।
বন্যপ্ৰাণী অভয়াৰণ্যৰ ভিতৰত কমলাগড় বেটনি, লংকেটাপু, শিয়ালিটাপু, শিয়ালিচাপুৰী, গাবেষ্টপু, বাঘেটাপু, পাব লাথিমাৰী, পশ্চিম লাথিমাৰী অঞ্চলত প্ৰশাসনে উচ্ছেদ অভিযান চলাইছিল।
বেদখল বিৰোধী অভিযানৰ সময়ত কোনো ধৰণৰ অপ্ৰীতিকৰ ঘটনাৰ পৰা হাত সাৰিবলৈ অৰ্ধসামৰিক, গৃহৰক্ষী, চি আৰ পি এফ, অসম আৰক্ষীকে ধৰি ২০০০ৰো অধিক নিৰাপত্তাৰক্ষীক মোতায়েন কৰা হৈছে।
